GIDASIG sa Department of Education (DepEd) Cebu Province ang mga magtutudlo nga magpabakuna batok sa coronavirus disease (Covid-19) kon moabot na ang ilang turno sa vaccination program sa kagamhanan.
Giluwatan kini ni DepEd Cebu Province Schools Division Superintendent Dr. Marilyn Andales dungan sa pagtataw nga di pugsanay ang pagpabakuna.
Matod ni Andales nga adunay pipila nga nag duha-duha sa pagpabakuna gumikan sa kahadlok.
Duna usay dili magpabakuna tungod sa gihambin niini nga balatian.
"Naa pod, natural feelings labi na naa kay existing nga mga sakit. Kuan sila apprehensive what might be the effect kon naa unya naa ko ani nga sakit. Pero naa poy isog ,naa pod uban ganahan,"matod ni Andales.
Tungod sa padayon nga hulga sa Covid-19 sa lalawigan, iyang giawhag ang mga magtutudlo sa pagpabakuna ilabi na sa iyang gipanglantawan nga pagpahigayon sa limited face-to-face classes kon tugotan na ni Presidente Rodrigo Duterte.
Si Duterte uyon na unta sa limitadong face-to-face classes sa mga dapit nga luwas sa Covid-19 nga ubos na usab sa modified general community quarantine (MGCQ).
Apan nausab ang iyang baruganan dihang nisulbong ang mga kaso sa Covid sugod niadtong Enero.
Duna nay mga dapit nga natumbok ang DepEd alang sa inatubangay nga klase.
"Oo encouraged.... pero mao na dili man sila pugson...Encouraged lang kay naa man pod nay right," pagpasabot ni Andales.
Sa kasamtangan prayoridad una sa kagamhanan ang pagpamakuna sa mga healthcare workers sa mga hospital tungod sa ilang adlaw-adlaw nga hulga nga giatubang. (ANV)