Sa pagkamatay ni National Basketball Association (NBA) legend Kobe Bryant sa usa ka helicopter crash niadtong Enero 2020, misaka dayon ang balor sa mga gamit nga adunay pirma sa Los Angeles Lakers superstar.
Usa na niini mao ang ticket sa iyang labing ulahing duwa sa Staples Center niadtong Abril 13, 2016 batok Utah Jazz.
Ang ticket nga adunay pirma sa five-time NBA champion nahalin og dul-an P2 milyones ($40,590) sa auction block sa Goldin Auctions human sa 42 ka bids. Ang ticket nga nahalin anaa sa Section 302, Row 2W, Seat 2.
Ang uwahing duwa ni Bryant, diin miiskor kini og 60 puntos aron agakon ang Lakers sa kadaugan, 101-96, nabutang sa kasaysayan isip pinakanindot nga retirement game sa usa ka atleta.
Ang maong duwa maoy ningtiklop sa 20 ka mga tuig ni Bryant sa NBA diin bugtong sa Lakers lang siya nagduwa.
Nakahatag siya’g lima ka NBA titles sa Lakers. Ang three-peat niadtong tuig 2000-2002 kauban si Shaquille O’neal ug ang back-to-back niadtong 2009-2010 diin ang iyang katambayayong mao ang Spanish center nga si Pau Gasol.
Giila si Bryant sa iyang scoring ability, clutch shooting ug mental toughness sa iyang playing years.
Usa pud siya sa greatest scorer of all time, diin nabutang siya No. 4 scorer of all-time nga adunay 33,643 puntos.
Usa sa highlight sa iyang karera mao higayon nga nipakatap siya og 81 ka mga puntos sa duwa batok sa Toronto Raptors niadtong 2006.
Lakip sa mga award ni Bryant mao ang 2-NBA Finals MVP , NBA season MVP, 4-NBA All Star MVP, 2-time scoring champion, NBA Slam Dunk Contest champion, ug uban pa. (RSC)