Gibutyag ni San Miguel Beermen coach Leo Austria nga malangan ang pagbalik og duwa sa Sugboanong higante nga si JuneMar Fajardo gumikan kay nakasinati kini og infection sa iyang gioperahan nga tiil.
Matod ni Austria mao kini ang hinungdan nga wala pa hingpit nga naalim ang angol sa produkto sa University of Cebu (UC) Webmasters.
Asoy sa multi-titled nga coach nga nasinati ni Fajardo ang iyang infection niadtong Disyembre sa miaging tuig nga maoy hinungdan nga wala naalim ang angol sa gilauman nga petsa.
Nagkanayon si Austria nga niini higayuna, makaapil na unta si Fajardo sa ilang praktis kon wala pa na-infected ang iyang gioperahan nga tiil.
Tungod niini, gilaumang dili pa makabalik ang six-time MVP sa sayong bahin sa 2021 season sa Philippine Basketball Association (PBA) nga sugdan karong Abril 9, 2021.
Hinuon, asoy ni Austria, nga labing seguro, makabalik ra og duwa sa umaabot nga season ang lumad nga taga Pinamungajan, Cebu apan wala pa lang siya masayod kon kanus-a.
“Nagkaroon siya ng setback. Supposed to be, this March kasabay na sana siya naming magpa-practice,” batbat ni Austria nga napatik sa www.abs-cbnnews.com.
“But I was assured by the doctors before na definitely he will play this coming season. Hindi ko lang ma-assure is yung first game namin, kasi tentatively, mag-o-open tayo ng April 9.”
Sa kasamtangan, nibalik si Fajardo sa iyang aqua training gumikan kay gidid-an pa siya sa mga doktor nga moapil sa praktis sa Beermen.
“Makukuha niya naman yung schedule niya through his training. I think makakabalik siya this coming season,” batbat ni Austria.
Giklaro ni Austria nga dili niya ahaton ang pagbalik ni Fajardo kon dili pa kini hingpit nga maalim.
“Ang concern namin is not to force him to play if he’s not 100 percent,” pasabot ni Austria.
“Alam naman natin si June Mar, ang value niya not only with San Miguel but also for Philippine basketball.”
Sa pagpadaplin ni Fajardo, natangtangan ang Beermen sa ilang All-Filipino title sa miaging bubble season. (ESL)