Human naningkamot ang mga batang Lumad nga makatungha pinaagi sa Bakwit School, angay nga tan-awon ang kontrobersiya kabahin sa pag-raid sa retreat house sa University of San Carlos-Talamban Campus nga dili lang pagtamak sa katungod sa mga bata, usa kini ka pag-atake sa kinatibuk-ang Lumad.
Dugay na nga nakigbisog ang mga indigenous people sa Pilipinas sa ilang katungod sa ilang yuta subay sa atong kasaysayan.
Niadtong miabot ang mga Kastila nga gi-convert ang ilang mga luna isip private property, napugos ang mga indigenous people nga muadto sa kalasangan aron makasustener.
Ang konsepto sa kalambuan nga atong gipugos kanila maoy hinungdan nga nahikawan sila sa ilang ancestral lands. Dili motakdo ang pagmina, logging, ug commercial agriculture sa ilang katungod nga mopuyo sa ilang ancestral lands. Pinaagi sa edukasyon, nakat-on sila nga makigbisog.
Ang edukasyon nakahatag sa mga Lumad og kaalam sa pagduso sa ilang katungod. Pinaagi sa tabang gikan sa non-government organizations (NGOs) tungod sa kakuwang sa serbisyo sa goberyno, natukod ang mga alternatibong tunghaan alang sa mga indigenous children aron mahimong accessible ang pagtungha alang kanila.
Dunay mga tunghaan nga namugna nga nagpatuman og kurikulum nga haom sa mga panginahanglanon sa mga Lumad.
Mga leksyon kabahin sa ilang mga katungod, pag-amping sa kinaiyahan, ug agrikultura maoy pipila sa mga nakat-unan nila aron mahatagan og pagtagad ang ilang kultura ug kaliwatanon.