Diputado: Pagbangon sa ekonomiya

MAO kini ang akong mga pangutana bahin sa pagbakuna sa anti-Covid vaccine nga Sinovac.

Mahimo ra ba magpabakuna kon dunay malignant tumor sa lawas?

Mahimo ra ba magpabakuna bisan kon dunay gi-maintain nga tambal para sa high blood ug diabetes?

Kadtong dunay gitawag og Depression, pwede ra ba pabakuna? Kon duna kay hereditary nga sakit sama sa Albinism, pwede ra ba pod?

Kon dunay unstable nga cardio-vascular diseases, pwede ra patusok? Kon gikan gioperahan og major surgery, pwede ra ba patusok pod?

Kadtong nagamit og Euthyrox, pwede ra ba pod? Kadtong mga babayeng mabdos, luwas ra ba magpa-bakuna?

Kon taudtaod na nag-gamit og immuno-suppresive nga druga, luwas ra ba nga mag-pabakuna? Kanang dunay moderate to severe anemia, pwede ra ba pod?

Kon dunay Hepa-B, pwede ra ba magpatusok?

Maayo unta og dunay mangahas pagtubag sa akong mga pangutana.

* * *

Makaibog ang nasod sa Israel.

Matod pa sa balita, gibuksan na og sugod ang mga patigayon sama sa restaurants, bars, café human mabakunahi ang 40% sa iyang mga katawhan.

Kining pagbukas maoy usa sa mga paagi nga mohinay na pagbangon ang sama sa natumba nga ekonomiya didto sa maong nasod.

Ingon ana sila kakusog molihok. Wala sila mosugot nga gaposon na lang sa kahadlok sa Covid.

* * *

Mao usab kini ang nahitabo kaniadtong miaging Biyernes didto sa Lamac, Pinamungahan atol sa paglusad sa Enhanced Countryside Development (ECD) Program in Gov. Gwen Garcia.

Ang maong programa naglatid sa mga pamaagi nga mobangon na ang nahugno nga ekonomiya sa probinsiya pinaagi sa duha ka mga sub-programs – SugBusog ug Sugbo Negosyo.

Ang unang programa naglatid sa mga paagi sa pagpalambo sa panguma pinaagi sa paghatag og ayuda sa mga mag-uuma aron padayon ang ilang pagseguro nga adunay pagkaon kanunay ug walay gigutom.

Gawas sa produksiyon sa pagkaon, tabangan sab ang mga mag-uuma nga mahalin ang ilang abot og maka-ganansiya sila sa ilang panguma.

Ang ikaduhang programa naglatid sa mga pahulam sa tulo ka mga bangko – Land Bank, DBP ug Philippine Veterans Bank.

Mohatag og mga pahulam ang maong mga bangko aron dunay magamit nga puhunan ang mga katawhan sa ilang ginagmay nga negosyo aron mokita kini og makasugod na sila sa ilang naandan nga panginabuhi.

Mapasalamaton si Gov. Gwen Garcia sa tabang sa tulo ka mga bangko og nanghinaot siya nga pinaagi sa mga pahulam, makabangon na og sugod ang ekonomiya sa probinsiya.

Supak ang gobernadora nga padayonon sa katawhan ang kahadlok sa COVID tungod kay mas makahadlok pa, matod niya, ang kagutom o kawalay pagkaon.

Nindot nga ehemplo nga unta panaminan sa ubang mga gobernador sa nasod.