Ingon mo nga naglubog na si Cebu City Mayor Edgardo Labella ug di makabarug kay grabe ang sakit.
Tan-awa sa inyong gihimong pagpanunglo sa mayor, kamo ang nauwawan sa kada fake nga balita sa kampo sa kontra ni Labella.
Mibalik na og report sa City Hall si Labella sa pagmatuod nga bakak ug nagbutangbutang lang tungod sa kalagot sa kontra.
Paabot na lang kamo sa 2022 election. Kana kon dunay election kay naa ra bay pandemiya.
Nagpalakaw og istorya sukad nga wa na mo-report sa iyang opisina sa City Hall ug nag-work from home si Labella kay naglisud na kuno.
COVID VARIANT
Daghang nagpaabot nga ang Department of Health (DOH) mokonpirmar ug mopahibawo nga ang taas nga pagsaka sa Covid-19 sa Sugbo, ang variant na ba kini?
Hangtud karon wa pay tingog ang mga opisyal sa maong buhatan ug kon unsa na ang resulta sa sample nga ilang gipada sa Manila.
Para nako, daw variant ang kaso kay taas man matag adlaw ang pagsaka ug unya wamay nangamatay.
Wa man ko mangandoy anang variant apan mas maayo na lang ikompara sa Covid-19 kay way nangatigbak.
Katong pag-igo sa Covid-19 sa 2019 ug 2020, naghuot ang mga ospital ug di na modawat og pasyente ug daghang nangamatay.
Ning 2021, taas ang kaso sa Covid apan ang mga pasyente atoa sa quarantine centers gibutang.
Sa pagsuwat nako ning lindog, dunay namatay sa quarantine center tungod sa Covid. DOH, palihug lang isulti ninyo nga variant na ni ug dili kadtong Covid-19 nga makapatay?
Mas maayo man ang variant. Apan palihug katawhan atong tahuron ug sundon ang health protocol kay di lalim magkasakit, magpalit man gihapon ta og tambal.
Sa akong research misamot kadatu ang mga drug manufacturing company. Mimahal pa gyud ang tambal ug unya wa may pag-aksiyon ang Department of Trade and Industry (DTI).
(Email: efrenlonzon71@gmail.com / Text:09235562777)