Calbayog City, Samar--Imposible alang sa anak ni Calbayog City Mayor Ronald Aquino nga ang grupo sa iyang amahan ang niuna pagpamusil sa giingong mga sakop sa Integrity Monitoring and Enforcement Group (Imeg) ug Provincial Drug Enforcement Unit (PDEU) atol sa engkwentro sa Barangay Lonoy ning siyudad.
Matod ni Mark Aquino sa interbyu sa sibyaanang DZRH, daghan ang nakakita nga ang grupo sa iyang amahan ang giunhan pagpamusil.
Gisugilon usab ni Mark nga plano nga i-sandwich ang grupo sa iyang amahan kay dunay sakyanan nga nakapwesto dayon sud sa tulay ug dunay laing duha ka mga sakyanan dayun gawas sa tulay.
Gipadayag usab sa anak nga ang gisakyan nga Toyota Hi Ace van sa iyang amahan ilado na sa ilang lugar kay maoy kanunay nga sakyan kon dunay tambungan nga kalihukan.
Gawas pa, pipila ra sa ilang lugar ang dunay sama niini nga sakyanan.
Gisugilon usab ni Mark sa interbyu nga wa nila gisalikway ang posibilidad nga may kalabutan sa pulitika ang hinungdan sa krimen. Dugang sa anak, gipaabot lang nila ang resulta sa imbestigasyon.