Sugod sa Abril 15, ipatuman na ang centralized automated ticketing system sa Cebu South Bus Terminal (CSBT), diin cards nga i-swipe na ang gamiton, inay tickets.
Mao kini ang gipahibaw sa Kagamhanan sa Lalawigan sa Sugbo human gipahibaw sa kadagkoan sa Topline Hightech and Synergy Corp. nga andam na ang moderno nga paagi. Ipahigayon ang dry run sa Marso 15.
Ang Topline maoy gi-awardan sa Kagamhanan sa Probinsya sa Sugbo sa kontrata pag-modernize sa pag issue sa ticket sa terminal aron mahimong hapsay ug di na maghuot ang mga pasahero sa ganghaan.
Matod ni Cebu Governor Gwendolyn Garcia nga ang pag-modernize sa terminal nahisubay sa direksyon sa nasudnong kagamhanan ubos sa public transport modernization.
Ang tanan nga bus companies ug operators nga mogamit ug mosulod sa terminal kinahanglan nga mopirma og kasabotan tali sa Topline aron mas sayon alang kanila ang pag remit sa koleksyon sa plitehan ngadto sa bus companies.
Subay sa tigom, uban ang mga opisyal ug representante sa mga kompaniya sa bus sa Marso 8, gipahibaw ni Garcia nga ang tanan nga bus lines nga wa makapirma og kasabotan sa Topline di makasulod sa CSBT.
Pinaagi sa kasabotan, ang Topline maoy modawat sa bayad sa mga pasahero gamit ang automated cards.
Ang cards loadan og kantidad nga ma-deduct sa ilang pag sakay. Ila kining i-tap sa automated teller machines.
Ang load sa cards mahimong mapalit sa tindahan online o automated online banking.
Sa maong paagi, dili na kinahanglan pa nga molinya ang mga pasahero nga maoy sagad hinungdan sa pagpunsisok sa ganghaan sa terminal.
Ang maong paagi gipanglantawan nga makatabang usab sa estriktong pagsubay sa health protocol, ilabi na sa social distancing.
Gipasalig ni Eric Lim, ang pangu sa Topline. nga diretsong i-remit niini ang plite ngadto sa mga bus companies.