Dunay panultion nga nag-ingon, “It is better that 10 guilty persons escape than that one innocent suffer.” Mas maayo pa nga makaikyas ang napulo ka mga tawo nga sad-an kay sa mag-antos ang usa ka inosente.
Sa criminal law, gitawag kini nga Blackstone’s ratio tungod kay ang unang nagsuwat niini mao man ang usa ka mahistrado sa Inglatera nga si William Blackstone sa iyang Commentaries on the Laws of England niadtong 1760s.
Ingon sa mao kini ang gibasihan sa prinsipyo nga ang usa ka tawo presumed innocent until proven guilty. Mao kana nga sa interpretasyon sa mga balaod kriminal, kon dunay pagduda nga sad-an ang akusado, ang maong pagduda ihatag pabor sa akusado.
Sa People v. Rodriguez (G.R. No. 211721, Sept. 20, 2017), ang Korte Suprema niingon, “Where there is reasonable doubt as to the guilt of the accused, he must be acquitted even though his innocence may be doubted since the constitutional right to be presumed innocent until proven guilty can only be overthrown by proof beyond reasonable doubt.”
Apan niadtong Marso 2, 2021, sa boto nga 188 ang pabor, onse ang supak ug siyam ka abstention, gipasar sa ikatulo ug kataposang pagbasa sa House of Representatives ang House Bill No. 7814 nga magbalit-ad sa presumption of innocence ngadto sa presumption of guilt sa mga kaso sa illegal nga drugas.
Kini mag-amendar sa Republic Act No. 9165, ang Comprehensive Dangerous Drugs Act, ug magbutang og 20 ka presumption of guilt sa mga masikop sa kaso sa illegal nga drugas, matod pa ni Quezon City Rep. Jesus Bong Suntay, chairman sa House committee on human rights ug usa ka abogado.
Lakip sa presumed guilty mao ang mga drug protectors, drug coddlers, importers ug financiers. Si Surigao del Norte Rep. Robert Ace Barbers, chairman sa House dangerous drugs committee, niingon nga gikinahanglan kini kay sukad sa 2013, wa pay suspetsado nga drug protector, coddler o financier sa illegal nga drugas nga nasikop ug nakiha.
Apan wa kaha makasupak sa Konstitusyon ang maong balaudnon? Ang Section 14, Article 3 (Bill of Rights), 1987 Constitution nagkanayon, “No person shall be held to answer for a criminal offense without due process of law. In all criminal prosecutions, the accused shall be presumed innocent until the contrary is proved and enjoy the right to be heard by himself and counsel.”
Sa maong probisyon, klaro ang punto bahin sa “due process,” ang pagbista sa kaso sa di pa ka hukman nga sad-an o dili, ug ang “presumption of innocence,” nga ang akusado ilhon nga inosente hangtod nga mapruwebahan nga sad-an.
Gidasonan kini sa Rules of Court. Ang Section 1, Rule 115 (Rights of the Accused), Revised Rules of Criminal Procedure, nagkanayon, “In all criminal prosecutions, the accused shall be entitled to the following rights: (a) To be presumed innocent until the contrary is proved beyond reasonable doubt.”
Ang presumption of innocence sa akusado mabuntog ug mapukan lang kon dunay proof beyond reasonable doubt batok kaniya nga siya sad-an sa way makatarunganong pagduda. (edbarrita@gmail.com)