NALINGAW kong nagbasa sa post ni Konsehal Niña Mabatid kabahin sa iyang sentimento sa pulitika labi pa sa iyang mga kauban sa partido. Morag masabot nako nga daghan kaayong mga kahisagmuyo si Mabatid sa iyang situwasyon karon. Dili gumikan sa iyang pagserbisyo sa katawhan, kon dili gumikan mismo sa sistema nga iyang gisudlan ug sa iyang mga kauban. Dili hinuon tanan.
Si Mabatid nibutyag nga naay “ungo” sa City Hall. Matod pa niya ang “ungo” maoy nagpadagan sa City Hall. Maoy nagbuot sa tanan, labi pa sa mga budget. Wala hinuon niya hinganli apan usa kuno ka appointed official. Apan nahilum man siya kay morag gihangyo siya sa mga lider sa Partido Barug aron dili maguba ang ilang grupo ug madaut ang mayor. Karong bag-o, ni-post na sab si Mabatid sa Facebook kabahin sa iyang gisulti ngadto sa iyang Mama Salud. Nia ang dialogue:
Nina: “Ma, dili na nako kaya ang pulitika. Sige lang kog kasakitan. Gusto ko mosulti sa matuod, pero dili puwede kay basin initan ka og samot. Risgo akong kinabuhi. Kinahanglan nga makisama ka bisan makasuka na. Daghang plastic. Wala ka kabalo kinsa imong kasaligan. Kon mobuhat kag tarong ug maayo, suyaan ka.”
“Bisan kauban unayon ka. Bisan elected official ka, daug-daugon lang ka sa appointed official. Yatakan pa imong posisyon ug imong pagkatawo. Makita nila sikat ka, birahon ka paubos. Gamitan pa ka og black propaganda para maguba ka. Kon gusto ka ma-in, you have to kiss their ass. Hadlukon pa ka nga tangtangon ka kon dili ka makisama. Grabe ka hugaw aning pulitika. Dili naman, Ma, maagwanta.”
Tubag sa iyang Mama Salud: “Mirisi, ngano bitaw nga sud-sud ka.” Aw, nganong mi-enter?
Mo-second the motion ko sa imong Mama Salud, Konsehal Mabatid. Pagkanindot ug pagkahayahay sa imong kinabuhi kaniadto nga diha pa ka sa corporate world. Sige kag biyahi ug dako og income sa imong placement ug recruitment company, ang Pinoy Care. Pero nagalgal gyud ka sa pulitika kay gusto laging moserbisyo sa katawhan. Karon, naputos ka sa mga intriga ug gibulingan-bulingan pa ang imong ngalan. Aw, mao nay bugti sa imong pagpakabana ug pagmahal sa katawhan. Padayon lang gihapon.