LALAKENG hubog napatay sa kapulisan atol sa ginukdanay human siya giingong nang hostage og usa ka tiguwang babaye sa Miyerkules sa gabii, Marso 10, 2021 sa lungsod sa Catmon, amihanang Sugbo.
Ang napatay giilang si Arnel Alivio, taga Barangay Jubay, lungsod sa Liloan, amihanang Sugbo.
Matod ni Police Lt. Phil Castro Restauro, hepe sa kapulisan sa Catmon, sa wa pa ang ginukdanay, mga alas 5:30 sa hapon sa samang adlaw, si Alivio nakakitag lalis tali sa mga nanan-aw ug mga magduduwa sa billiards sa Purok 1, Sityo Tinibgan, Barangay Panalipan, Catmon.
Sa wa pa mograbe ang kagubot, nisibat si Alivio sakay sa iyang motorsiklo padung sa habagatan.
Mga alas 7:30 sa gabii, nibalik si Alivio nga nagdala na og .45 kalibre nga pistola, nanghulga sa mga tawo ug giingong nang-hostage sa usa ka Mrs. Bolane, 67.
Naatol usab nga diha sa lugar ang mga pulis, ilang narespondihan ang hitabo.
Giingong gisuwayan og pusil ni Alivio ang mga pulis apan ang armas nikagar hinungdan nga dali siyang nieskapo sakay sa iyang motorsiklo.
Samtang nagdagan, nakabangga siya og laing motorsiklo nga gimaneho ni Emelio Abreu, 38, taga Brgy. Damolog, Sogod.
Nalamba si Alivio ug nalabay ang iyang pistola.
Apan giingong nilanit siya sa iyang back-up nga laing kalibre .45 nga pistola ug gipamusil ang mga pulis, apan wa siya makaigo.
Nibawos ang mga pulis, naigo siya. Daling gidala si Alivio sa Sogod District Hospital sa Barangay Damolog, apan patay nang naabot.
Si Abreau nga nakaangkon og mga samad naa usab sa district hospital na-admit.
Nakuha gikan kang Alivio ang duha ka kalibre .45 nga mga pistola nga dunay mga bala ug magazine, mga identification (ID) card, XRM nga motorsiklo ug cellphone. (GPL)