NAKATALA og 13 ka mga bag-ong kaso sa coronavirus disease (Covid-19) ang Cagayan de Oro, pulos mga local transmissions, sumala sa report sa City Health Office Huwebes, Marso 11.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3,903.
Sumala ni City Health Officer Dr. Lorraine Nery, sa 13 ka mga bag-ong lokal nga kaso, duha ang mga lokal authorized persons outside residence (Apors), 10 ang mga local index nga mga kaso, ug usa ang local case with link.
Sa 3,903 nga kinatibuk-ang kaso sa Covid-19 sa syudad, 422 ang mga returning overseas Filipino workers/locally stranded individuals (ROFs/LSIs) ug 3,481 ang mga local transmissions.
Ang Cagayan de Oro adunay 133 ka mga active cases, 48 niini na-admit sa Northern Mindanao Medical Center ug uban pang mga ospital sa syudad ug 85 ang mga outpatients.
Nakatala usab og pito ka mga Covid-positive nga mga kaso nga karon naka-recover. Anaa na karon sa 3,585 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 119 ang mga ROFs, ug 3,164 ang mga lokal nga kaso (community: 2,677; Apors: 487).
Ang recovery rate sa Cagayan de Oro anaa na sa 91.85 percent.
Ang ihap sa mga namatay sa Covid-19 sa syudad naa sa 185.