Ang Commission on Elections (Comelec) pinaagi sa Resolution No. 10695 mitakda sa schedule sa pag-file sa certificate of candidacy (COC) sa tanang modagan sa Mayo 9, 2022 nga national ug local elections karong Oktubre 1–8. Ang election period magsugod sa Enero 9, 2022 hangtod sa Hunyo 8, 2022. Sa pagka-karon, mibukal na ang kaldero sa pulitika labi na sa buot molansar sa pagka-presidente sa nasud.
Ako sayud nga aduna nay gitukod nga mga organisasyon ang nagpaluyo kang Senador Manny Pacquiao nga gitawag og Manny Pacquiao for President Movement, diin usa ka taga-Sugbo ang secretary general. Ang abogado usab ni kanhi senador Bongbong Marcos mipahibawo nga modagan gayud ang iyang amo apan wala pa maklaro kon presidente ba o bise. Murag mag-agad kini sa desisyon ni Davao City Mayor Sara Duterte Carpio.
Si Presidente Rodrigo Duterte kanunay nga mopahibawo nga dili siya buot nga modagan sa pagka-presidente si Sarah. Kon mahitabo kini, posible nga modagan si Marcos aron maoy mopuli kang Duterte sa Malacañang. Dihay higayon nga magpasabot ang Presidente nga gusto niya nga si Marcos maoy mopuli kaniya.
Apan ambut og nausab ba ang huna-huna sa Presidente? Sa joint meeting sa national and Regional Task Forces to End Local communist Armed Conflict (ELCAC) sa Cagayan de Oro City, Misamis Oriental, iyang gitawag si Senador Bong Go og presidente. Iya pa gayud nga gipatindog ang senador nga nakaani og daghang pagakpak sa mga nanambong. Sa situational briefing usab sa impact sa Bagyong Auring sa Tandag City niadtong Pebrero 23, giawhag na usab sa Presidente si Go nga modagan pagka-presidente.
Si Chief Presidential Legal Counsel Salvador Panelo, nga unang mi-awhag kang Mayor Sara sa pagdagan sa pagka-presidente, miingon nga kon dili molansar, si Sen. Go maoy iyang paluyohan. Kon mao, mas popular diay si Go sa mga tigpaluyo ni Duterte.
Ako usab gipahibawo na sa iyang mga insiders niadto pang milabay nga tuig nga nangandam nga mudagan sa pagka-presidente si Bong Go. Gani kon mahinayon kini, si Presidential Assistant for the Visayas Sec. Mike Dino modagan sa pagka-senador ubos sa iyang partido. Ambut kon unsay katinuoran niining maong impormasyon.
Daghang nalipay sa pag-report na sa iyang trabaho sa city hall ni Mayor Edgardo Labella. Mi-insister ang mayor nga bisan kon gidid-an pa unta siya sa doctor sa dili pagpakigsandurot sa mga tawo, apan suma niya nga mao kini risgo nga iyang gisudlan. Mahimo man nga dili lang kaayo daghang bisita ang dawaton sa iyang buhatan. Ang importante nga makita siya personal kay makahatag kinig inspirasyon sa katawhan. Manghinaut kita nga hingpit na nga maayo si Mayor Labella. (mannyrabacal1144@gmail.com)