MIABOT na ang mga donasyon nga mga bakuna gikan sa China ug ingon man ang gikan sa World Health Organization (WHO) nga gitampu-tampuhan sa adunahang mga nasud sa European Union ug Estados Unidos alang sa mga pobreng nasud. Puro ni mga donasyon. Ang Sinovac gikan sa China ug ang AstraZeneca gikan sa WHO. Ang gipamalit sa atong kagamhanan wala pa ma-deliver. Mipalit usab ang kagamhanan sa Pfizer-BioNtech nga hinimo sa Amerika.
Ang uban mipili sa matang sa bakuna nga gusto nilang ipabakuna. Sama sa mga senior citizen nga mga opisyal sa kagamhanan. Si DOH Sec. Francisco Duque III wala magpabakuna sa Sinovac kay ang maong bakuna alang lang sa mga mag-edad og 18 ngadto sa 59 anyos. Bisan si Presidente Rodrigo Duterte wala magpabakuna sa Sinovac kay 74 anyos na siya. Gusto sila sa AstraZeneca kay walay age bracket.
Gumikan kay ang katawhan nagtan-aw man nila nga mga modelo, posible nga mosunod usab ang katawhan sa ilang baruganan. Mopili usab ang mga tawo sa bakuna nga ilang gusto. Tinuod, wala may pugsanay ning pagpabakuna. Apan sa situwasyon karon, wala man kitay laing pilian. Duha ra man kay mao ra may naabot dinhi nga libre para sa katawhan. Aw, ang mga taga pribadong sektor sama sa mga kompaniya nga maka-afford sa pagpalit makapili sila. Pero ang nagsalig sa gobiyerno, mapugos sa pagdawat kay libre man.
Matod nila nga kitang tanan adunay katungod sa atong kaugalingong opinyon. Tinuod kana. Apan kadtong tawo nga mipasandig sa iyang opinyon sa makinaadmanon nga pagtuon mao ang naghupot sa mas bug-at nga katungod sa iyang opinyon. Sama pananglit sa atong pagpili sa matang sa bakuna batok sa Covid 19. Ang tanan kinahanglang magbaton nianang gitawag og informed choice.
Maangkon lamang kini niya kon hatagan siya sa tanang kasayuran, tanang option nga iyang pagapilian sa matang sa bakuna. Mga detalye, mga benipisyo, risgo ug linugdangan sa maong produkto. Ug dili kay iagad lang niya ang iyang panglawas sa mga tagna tagna o suway-suway nga mga paagi. Kay hilabihan baya ka bililhon sa kinabuhi nga isugal lamang sa mga hanap ug way klaro nga mga pagpamasin. (bobbygnalzaro@gmail.com)