Mapun-an ang mga unit sa traditional public utility jeepneys (TPUJ) nga mobiyahe pasud sa Dakbayan sa Sugbo human giaprobahan ni Cebu City Mayor Edgardo Labella nga makasud na ang mga PUJ gikan sa Mandaue City sa Lunes, Marso 15, 2021.
Ang units gibana-banang wa makaabot og 20.
Si Labella, sa interbyu sa Marso 11, nianunsyo sa iyang pag-aprubar sa rekomendasyon sa Jeepney Task Force ug magpagawas siya og executive order sa Marso 12.
“Because firstly, I received favorable recommendation from the ad hoc committee headed by Councilor (James Anthony) Cuenco,” matod ni Labella.
Nakita ni Labella nga kinahanglan nga pun-an ang mga TPUJ nga nagbiyahe aron makatabang sa publiko.
Matod ni Labella nga kinahanglan sad nga pun-an na ang mga TPUJs nga magbiyahe sanglit makatabang kini kay hinayhinay na ang pag-abli sa ekonomiya sa dakbayan.
Matod niya nga makatabang sab kini sa mga drayber para mabalik ilang panginabuhian.
Nanghinaot si Labella nga hugot ang pagpatuman sa mga drayber sa mga health protocol sa nagkadaiyang mga PUJ.
Matod niya kung tingale mudaghan ang mga makalapas sa balaod, pwede niya nga mapahunong og balik ang operasyon niini.
Giinstraksyunan sad ang Cebu City Transportation Office (CCTO) sa pag-monitor sa mga sakyanan.
Usa sa mga bantayanan sa mga pampublikong sakyanan sa Dakbayan sa Mandaue mao ang bike lanes.
Mahimo silang makapasakay ug makapanaug og pasahero, apan di sila makadagan subay sa bike lanes.
Samang polisiya sa Cebu City, apan wa pa mapatuman.
Ang duha ka mga Siyudad nagdili sa parking sa bike lanes.
Mapasalamaton ang mga kooperatiba sa mga TPUJ sa Kagamhanan sa Siyudad sa Sugbo.
Nipadala og suwat ang Mandaue Transport Cooperative ngadto sa Konseho sa Dakbayan sa Mandaue nga tugutan na ang mga PUJ makasulod sa Siyudad sa Sugbo.
Ang suwat gisuportahan ni Konsehal Jimmy Lumapas, chairman sa committtee on transportation sa Konseho.
Ang Konseho nagpapasar og resolusyon bahin sa hangyo ug gipadala kini ngadto sa Cebu City.
Si Loreto Geres, pangu sa kooperatiba, niingon nga malipayon sila sa maong balita.
Mapasalamaton siya nga gidungog ang ilang dugay na nga hangyo.
Mas motaas nang ilang byahe ug di na magtuyok palibot sa dakbayan sa Mandaue.
Positibo siya nga motaas na ilang kita ug makadala na sila og saktong kwarta pangkonsumo sa ilang pamilya.
Duna silay mga 20 ka TPUJ, sagad nagbiyahe sa Country Mall, Cebu Business Park ug V. Gullas Street.
Ang kooperatiba duna untay 105 ka units sa wa pa ang coronavirus pandemic.
Sa laing bahin, si Greg Perez, chairman sa Pinagkaisang Samahan ng mga Tsuper sa Operators Nationwide (Piston) Cebu, mapasalamaton sila kang Labella kay mao kini ang ilang adbokasiya nga “Balik Pasada” ug “Balik Rota” alang sa mga drayber.
Karon nga ang ilang mga miyembro mahimo na nga makasulod Cebu City nga dili dakpon, sigon ni Perez nga dako kining tabang sa mga drayber ug sa ilang pamilya.
Sa 300 ka mga miyembro nila sa Dakbayan sa Mandaue, kapin sa 10 ka mga TPUJ ang nibalik sa operasyon, lima niini nagdagan gikan sa Mandaue paingon sa Cebu City.
Tungod sa hapit usa ka tuig nga wala makabyahe, matod ni Perez nga ang kadaghanan sa ilang mga miyembro nagmaneho na og bus o mga pribadong sakyanan sa mga kompaniya ug ang uban niuli sa ilang mga probinsya. Sigon ni Perez nga usa sab nga gamay ra ang nibyahe tungod gamay lang sab ang nakapasar sa screening sa mga sakyanan.