Ang turno-turno sa mga molupyo sa barangay sa Dakbayan sa Sugbo sa pagsulod sa Carbon Public Market nga unang giplano sa kapulisan ug kagamhanan sa Siyudad sa Sugbo atol sa Semana Santa gisalikway o dili na ihinayon human gipalapdan ang entrada ug paggawas o exit aron dili maghuot ang mga tawo.
Si Police Lieutenant Colonel Wilbert Parilla sa Cebu City Police Office (CCPO) nagkanayon nga nahukman sa mga nagdumala sa Carbon Public Market nga himuong tulo ang entrada ug paggawas sa merkado.
Ang mga entrance gate nahimutang kini sa dalan MC Briones, dalan Magallanes ug dalan Escaño diin adunay daghang mga pulisang ipabantay alang sa paggiya sa mga tawo kung asa sila mahimong moagi.
Gipasabot ni Parilla nga atol sa tigom uban ang mga representante sa Emergency Operation Center (EOC) ug market administrator nga kung ihinayon ang turno-turno, mosamot lang ang problema sanglit malangay na ang mga tawo sa pagsulod kung pangitaan pa og papeles kung kini nagpuyo ba sa barangay nga maoy naka-schedule sa maong adlaw.
Aron mahimong sayon ug dili magdasok ang mga tawo, ang mamaligyaay sa mga sagol sa binignit gipalapdan kini hangtod na sa gawas sa Carbon Market aron hamugaway ang mga mamalitay niini.
“Ang kining portion para sa mga binignit ingredients niya sama sa saging ug tanan niya nga galamiton gi-extend siya hangtod sa gawas. There are three areas na gibahin siyag tulo ka dapit gawas sa iyang existing gipun-an pa gyud siyag laing area nga adto pwedeng mamaligya og mga sagol sa bibignit,” matod ni Parilla.
Gawas sa pagpakatap og daghang pulis sa Carbon Market, magbutang usab ang CCPO og mga pulis sa mga merkado sa kabarangayan sama sa Ramos Public Market, Pardo, Lahug ug Banawa.
Mobutang usab ang kagamhanan sa siyudad og mga taga Task Force Kasaligan, Prevention, Restoration, Order, Beautification and Enhancement (Probe) team ug City Environmental Sanitation and Enforcement Team (Ceset) nga maoy manakop sa mga makalapas sa ordinansa sa dakbayan sa maong mga adlaw.
Wala na usab gidid-an ang taga probinsya sa Sugbo nga makasulod sa Carbon Market tungod kay wala na man silay pagsusi sa mga quarantine pass. (AYB)