COTABATO CITY -- Patay ang tulo ka binuhing kabaw samtang naangol ang usa ka bata human matumba ang poste sa kuryente alas 4:50 sa hapon, Huwebes, Marso 11, didto sa Buldon, Maguindanao Province.
Ang bata nga 12 anyos ang pangedaron giila nga si Joel Bacong, nagpuyo sa nahisgutang lugar.
Nasayran gikan sa taho sa Buldon Municipal Police Station nga gikuha ni Bacong ang tulo nila ka kabaw nga gitugway sa iyang amahan kilid sa kalsada sa nasampit nga dapit.
Apan sa wala damha, kalit nga natumba ang poste sa Cotabato Electric Cooperative (Cotelco-PPalma), hinungdan ang mikirig ang tulo ka kabaw nga naigo sa live wire ug on the spot nga namatay.
Samtang si Bacong wa makuryentihe apan giingong naigo sa tumoy nga bahin sa poste ug daling gitabang ug gihatud ngadto sa balay tambalanan.
Nasayran nga nahitabo ang pagkatumba sa poste gumikan sa kusog nga huyop sa hangin nga pinisik sa low pressure area nga nia sa Mindanao.
Nagpaabot gilayon og hinabang ang Cotelco-PPalma sa pamilya sa bata ug motabang sab sila sa pagpalit og mga kabaw ngadto sa pamilya. (Edgar E. Fuerzas)