UNSAY sukdanan sa gugma alang nimo? Matawag ba nga gugma ang kaluoy ngadto sa usa ka tawo?
Aniay sugilanon sa gugma nga nagsugod sa Carcar City Hall. Kini mao ang love story nila ni Juhn Vincint Diapera, 24, ug Lelit Lapatis-Diapera, 29.
Niadtong 2017, dihang una sila nga nagkaila.
Niadtong higayona, nag-on the job training (OJT) pa si Juhn sa Carcar City Hall.
Gipailaila sila nga mga OJT ngadto sa mga staff sa Mayor’s Office, apil si Lelit.
Sa unang pagkakita pa lang ni Juhn kang Lelit, na “love at first sight” na siya.
Human sa usa ka buwan, nagsige nag atang si Juhn kang Lelit sa gawas aron mo-greet og “good morning” ug “good afternoon” ug nangulit mangayog number sa cellphone sa dalaga.
Human sa usa ka buwan, gihatagan og no. ni Lelit si Juhn. Apan no. sa cellphone sa iyang bestfriend nga si Leonardo Sabellano ang iyang gihatag.
Wala kaayo magtagad si Lelit kang Juhn kay ang naa sa iyang hunahuna niadtong higayona mao ang mopasar sa Licensure Examination for Teachers (LET).
Niadtong Septiyembre 7, 2017, gisugot ni Lelit si Juhn. Giangkon sa dalaga nga gisugot niya ang ulitawo aron maka-move on sa iyang kanhi hinigugma human sila nagkabuwag pagka Mayo 2017.
Apan human sa usa ka buwan, gibuwagan ra usab dayon ni Lelit si Juhn kay nagsamoksamok ang kanhi hinigugma ni Juhn.
Wala ra masakiti si Lelit sa ilang panagbulag kay tripping ra iyaha kang Juhn.
“Pero wala nako damha nga tinud-anay diay iyang love nako. Nihilak ug niluhod siya sa akong atubangan para akong balikan,” asoy ni Lelit.
Sigon ni Juhn, kang Lelit niya nabati ang kalipay nga iyang gipangita. Kini maoy naghatag og color sa iyang kinabuhi.
Usa ka buwan nga wa sila magtagad ug wa nay komunikasyon. Sa mga nahitabo, nakonsensiya si Lelit.
Nabalik ang ilang komunikasyon dihang ni-congratulate si Juhn kang Lelit human kini nakapasar sa LET.
Gisaad ni Juhn kang Lelit nga tinud-anay na siya nga way pagbati sa iyang ex girlfriend.
Gisaaran ni Lelit si Juhn nga dawaton og balik ang iyang gugma kon makahuman na siya og eskwela ug ipakita nga dunay direksyon ang iyang kinabuhi. Pulos na namatay ang mga ginikanan si Juhn.
Bisan og nagsige og “I love you” si Juhn ngadto kang Lelit, apan kaluoy lang gyud ang gibati sa dalaga alang sa ulitawo.
Naningkamot si Juhn nga matuman niya ang iyang saad ngadto kang Lelit.
Niadtong Enero 28, 2021, nagbinayloay sa ilang “I do” ang duha pinaagi sa civil wedding nga gipangulohan ni Carcar City Mayor Mercedita “Mercy” Apura sa buhatan niini sa city hall.
Giangkon ni Lelit ang iyang kaluoy alang kang Juhn sa sinugdanan, nahimo nga gugma.