USO siguro ron ang pag-angkon sa kon unsa may tinuod ninyong relasyon kay human ni Derek Ramsay, mipabuhagay usab si Gerald Anderson sa tinuod nilang estado sa gugma ni Julia Baretto sa usa ka interbyu ni Boy Abunda.
Malipayon kaayo ang kasing-kasing karon ni Gerald tungod kang Julia ug pareho silang malipayon sa ilang relasyon.
Siguradong mahuman na gyud ang mga espekulasyon sa pipila ka buwan o tuig na ba? Sa tinuod nilang relasyon.
Nahimong kontrobersyal kini sa dihang may mga hungihong nga misulod sa panahon nga anaa pa si Bea Alonzo.
Sa laing bahin, gisungog si Kim Chiu ni Vice Ganda sa programang “It’s Showtime” apan dali kaayong milikay ang Chinita Princess nga dili siya mag-apil-apil sa maong isyu.
Wala sab makalingkawas niini si Joshua Garcia ug daling gipanghimakak nga wala siyay FB account ug dili iya ang nag-viral nga post diin nag-congratulate kini kang Julia ug Gerald.
Ang duha parehong mga ex nilang Gerald ug Julia mao nga makahig gyud kini sa mga isyu sa usag-usa.
Mabalik ta kang Gerald. Basta sa maong interbyu ni Tito Boy malipayon kaayo karon ang lovelife niini uban kang Julia.
Apan ang kontrobersya ug intriga padayon gihapong nuntan ang duha kay nasugdan man ang ilang relasyon dinhi.
Kinsa may makalimot sa kontrobersyal nga panagbuwag nilang Gerald ug Bea kay kini man ang unod pirme sa social media.
Tinuod miangkon na silang Gerald ug Julia apan wala man nato mahibaw-i kon kanus-a gyud nahimong opisyal nga ilang panag-uyab? Ay’g Saba!
* * *
Popstar Royalty Sarah Geronimo magpabiling Kapamilya!
Daghan man gud ang nangutana kon mobalhin na ba sa Singko ang Popstar.
Kini tungod sa mga teaser sa bag-ong programa sa TV 5 nga “POPinoy” usa ka talent search sa bag-ong boy band nga buhaton.
May hugon-hugon nga si Sarah ang mahimong host niini, misamot ang mga tabi-tabi sa dihang nakita ang Popstar sa plugging niini.
Pero hugot kining gipanghimakak ni Vic del Rosario sa Viva Entertainment nga dili kini tinuod ug magpabiling Kapamilya ang singer/actress.
Magpabilin gihapon kini sa programang “ASAP Natin ‘To” bisan wala kini nato makita karon kay busy sa iyang mga preparasyon sa umaabot niining concert karong buwana ug may ipagawas sab kining bag-ong album.
Endorser ra gyud ang Sarah dinhi ug dili host.
Exclusibo gihapon ang Sarah sa ABS-CBN ug makita lang nato kini siya sa TV5 kon mogawas na kini sa programang ASAP, Ay’g Saba!