Binasi sa 2 Mga Cronicas 36:14-16, 19-23; Salmo 137; Taga-Efesos 2:4-10; Juan 3:14-21
NIADTONG Marso 5-8, miduaw si Papa Francisco sa Iraq. Lahi kini sa tanang mga biyahe nga iyang gihimo. Dako pa man god kaayo ang peligro gikan sa Covid-19 ug nagpabilin ang hulga sa mga terorista sa Iraq. Gani dili pa dugay, sa 2014, nagdumala ang ISIS sa pipila ka mga lugar sa Iraq. Lakip niini ang Mosul ug Qaraqosh diin ang mga Kristohanon nga taga-Iraq nag-agi og pait kaayo nga pagpanglutos sa kamot niining mga terorista.
Miadto si Papa Francisco isip usa ka peregrino sa kalinaw. Susama kini sa gihimo ni San Francisco de Asis nga sa tuig 1219, nakigtagbo ug nakigkulokabildo sa dako-dako sa mga Muslim sa Egipto, si Sultan al-Malik al Kamil. Samtang didto siya sa Iraq giduaw ug nagsaulog og mga misa si Papa Francisco sa mga Katoliko sa Iraq. Nakigkulokabildo usab siya sa dako-dako sa mga Shia Muslim sa Iraq, ang Grand Ayatollah Ali al-Sistani didto sa Najaf. Giampo niya ang mga biktima sa kapintasan samtang nanawagan og pagpasaylo ug kaisog.
Unya miapil siya og usa ka panagpundok sa mga lider sa nagkalainlaing relihiyon sa Ur, nga maoy gigikanan ni Abraham. Giila si Abraham nga amahan sa mga Judio, Kristiyano, ug Muslim. Sa maong panagpundok, gitawag ni Papa Francis ang pagdumot sa isigkatawo nga mao ang labing grabe nga pagpasipala batok sa Dios.
May usa ka pagduaw usab sa atong ebanghelyo. Miadto si Nicodemo, usa sa mga dakong tawo sa mga Judio, kang Jesus. Gabii kadto ug nakigkulokabildo siya kang Jesus. Dinhi gikan ang usa ka lisod tukibon nga mga pulong: “Amen, sa pagkatinuod sultihan ko kamo, gawas kon siya matawo pag-usab dili siya makakita sa gingharian sa Dios”. Apan diri pod mabasa ang usa sa labing kinaham nga mga linya sa tibuok bibliya: “Kay gihigugma gayod sa Dios ang kalibotan sa ingon nga gihatag niya ang iyang bugtong Anak aron ang tanan nga nagatuo diha kaniya dili mamatay kondili makabaton og kinabuhing dayon.”
Kining maong Anak sa Dios ibayaw sama nga gibayaw ni Moises ang bitin nga tumbaga didto sa kamingawan. Ang mga Israelita man god nagbagutbot batok sa Dios ug tungod niini nagpadala og mga la kaayong nga halas ang Ginoo nga mipaak sa mga tawo. Nagpakiluoy sila ug maalimahan ang mosud-ong sa bitin. Sa samang paagi, ang matuohong pagsud-ong sa gibayaw nga gilansang nga Jesus maayo usab sa mga espirituhanong balatian.
Gihisgotan sa libro sa mga Cronicas ang pagpabalik ni Hari Cyrus sa mga Judio gikan sa mga lugar diin sila gihinginlan. Mahimo diayng pabarogon og usab sa Ginoo ang mga tawo nga napukan. Ang pagduaw ni Papa Francisco sa Iraq makapabarog sa mga tawo ug tumutuong napukan.
Mao nga balikbalikan gyod ang paglitok sa mga pulong, “Dios, nga buhong sa kaluoy,” nga maoy mabasa sa sulat ngadto sa mga taga-Efesos. Giunsa pagpadayag ang maong kaluoy? “Bisan pa gani sa patay pa kita sa espiritu tungod sa atong pagkadaotan, gibanhaw kita niya uban kang Cristo”. Ang kahimtang sa tumutuo dugay nang gilaraw sa Dios “diha kang Cristo Jesus aron magbuhat kitag maayo nga maoy iyang tuyo alang kanato”.