NABILANGGO na ang usa ka Sugboanon nga nanghulga sa usa ka negusyante sa Mindanao pinaagi sa pagpaila nga siya usa ka kumander sa New People’s Army (NPA) sa alyas nga Kumander Malik nga kunohay nagbase sa Mindanao.
Human moreklamo ang negusyante ngadto sa kapulisan, ilang nasubay nga ang nisuway sa pagpangilkil ug nanghulga taga dakbayan sa Sugbo busa gilusad dinhi ang entrapment operation niadtong Martes sa gabii, Marso 9, 2021.
Ang suspek giilang si Benigno Tarle, 37, ulitawo, store attendant, taga sityo Ponce, Barangay Capitol Site, nasikop sa hiniusang operasyon sa Regional Anti-Cyber Crime Unit (RACU) 7 ug Police Station 2 sa Cebu City Police Office (CCPO).
Si Police Staff Sgt. Ronelle Jay Ocariza, sa RACU-7 nga nahinabi sa Superbalita Cebu, nagkanayon usa ka negusyante nga si Junaira Evangelista, taga Mindana, nangayog abag sa Kapulisan human gisigihan siyag tawag ug text ni Tarle nga nagpailang si Kumander Malik, lider sa NPA.
Si Tarle nibahad nga kon di siya mohatag sa demand nga P30,000, paulbuhon ang iyang restaurant.
Gumikan sa kahadlok ni Evangelista, nangayo siyag abag sa kapulisan ug nasubay nga dinhi sa Sugbo ang nanghulga.
Matod ni Ocariza, nga ilang gisabot ang mga staff sa money transfer sa Capitol Site nga mo signal nila kon makobra na ang kwarta. Human niini, ilang napusasan si Tarle ug nakuha ang mga ebedensiya, lakip ang cell phone. Si Tarle hugtanong nanghimakak nga siya nanghulga dihang giimbestigar sa kapulisan.
Siya nidepensa nga igo lang siya nga gisugo nga ipakuha ang kwarta ug makadaghan na siya gisugo sa pagkobra.
Matod ni Ocariza nga nihimo na silag mas lawom nga imbestigasyon kabahin.
W nila isalikway ang posibilidad nga duna pay laing tawo o negosyante nga nailad ni Tarle.
Nagtuo ang kapulisan nga alibi lang sa suspek nga dunay nagsugo niyang tawo.
Kasong robbery extortion ug kalapasan sa Cyber Crime Prevention Act (RA 10175) ang gipasaka sa kapulisan batok kang Tarle.