Dalagita nga lumad gipagawas na sa DSWD human korte mimando

GIPAGAWAS na sa Department of Social Welfare and Development (DSWD) 7, sa Biyernes sa hapon, Marso 12, 2021 si Mekaella Haictin, usa sa mga menor nga Lumad nga gikuha sa Department of Social Welfare and Development (DSWD) gikan sa usa ka resthouse sa Barangay Talamban, Dakbayan sa Sugbo.

Si Mekaella gitugyan sa departamento ngadto sa iyang amahan nga si Lope, kinsa nipetisyon sa korte, nga nipakanaug usab og paborableng hukom.

Si DSWD 7 Regional Director Rebecca Geamala niingon nga igo lang silang nituman sa mando sa korte nga gipakanaug niadtong Huwebes, Marso 11, ug gi-serve niadtong Biyernes, Marso 12.

Siya niingon nga si Mekaella ilang gikustodiya sulod sa 19 ka adlaw, gikan sa Pebrero 21 ngadto sa Marso 12.

“She was not kept. It is a center and to think about (it), may mga protection plan kami, protocols na they should not be going outside of the center at any rate kay delikado man sila,” pasabot ni Geamala.

“So, we are protecting the child, the minor. Pero now, the case has been favored to the father, let it be then,” dugang niya.

Sa walo ka pahina nga hukom nga gisuwat ni Presiding Judge Leah Geraldez sa Huwebes, ang korte niingon nga way igo ug legal nga basehanan ang pagkustodiya kang Mekaella sa DSWD 7 Crisis Intervention Center.

Ang Integrated Bar of the Philippines (IBP)-Cebu City chapter, nga nihatag usab og legal assistance kang Lope, nipadayag og kalipay sa pagpagawas na ni Mekaella.

Ang IBP Cebu City niingon nga mopasaka usab unta sila og contempt batok sa kapulisan ug DSWD kon nagpadayon pa sila sa ilang "contemptous" acts.

Nipetisyon si Lope sa korte inabagan sa IBP ug Free Legal Assistance Group (FLAG) human wa gitugyan kaniya ang iyang anak sa DSWD.

Sa katapusang semana sa Pebrero, iyang giduaw si Mekaella ug gusto na unta sa iyang anak nga mokuyog kaniya.

Sa iyang pagbalik, wa na siya pasudla sa DSWD ug duna pay bantay nga mga pulis.

Si Geamala niingon nga didto siya sa Dumaguete City alang sa usa ka opisyal nga biyahe dihang niluwat ang korte sa desisyon.

Gihatagan sila og 15 ka adlaw nga moratorium sa pag-file og motion for reconsideration apan wa kini nila buhata.

Bisan pa sa hukom sa korte, ilang bantayan ang kahimtang sa bata bisan toa na sa Zamboanga City kay nagkasabot sila sa ilang mga kauban sa munisipyo didto.

Si Mekaella usa sa mga menor nga lumad nga "gi-rescue" sa DSWD ug kapulisan niadtong Pebrero 15, 2021 sa resthouse sa mga SVD, diin sila gipapuyo sukad niigo ang coronavirus pandemic.

Tipik siya sa mga batang Lumad nga gidala sa dinhi sa Sugbo sa Save Our School Network (SOSN). / WBS, dugang taho ni REV

On March 4, Lope Haictin, through the assistance of the Integrated Bar of the Philippines (IBP), the Cebu For Human Rights, and the Free Legal Assistance Group, filed a petition for a Writ of Habeas Corpus against Police Regional Office (PRO) 7 director Brigadier Gen. Ronnie Montejo, Geamala, and Brenda Abilo, staff of the DSWD 7 Crisis Intervention Center to "produce the body" of Mekaella before the court, appear before the court and show cause of the detention of Mekaella. (WBS)