35 ka mga TPUJ sa Mandaue mobiyahe sa Cebu City

MALUAGAN na og gamay ang manakayay nga publiko human gipabuksan og balik ni Mayor Edgardo Labella ang pito ka mga rota sa traditional TPUJ sa Dakbayan sa Mandaue nga mamiyahe sa Dakbayan sa Sugbo.

Labing minos 35 ka mga TPUJ gikan sa dakbayan sa Mandaue ang mobiyahe na sulod sa syudad Sugbo.

Gikalipay sa mga miyembro sa Mandaue Transport Cooperative (MTC) ang kamanduan ni Labella tungod kay dugay na kini nilang pangandoy nga makalahos na sa Siyudad sa Sugbo.

Matod ni Loreto Geres, pangu sa MTC, nga makakompetensya na sila sa nagdagan nga mga bus ug modern jeep.

Niadto, kutob lang ang ilang mga miyembro sa border sa Dakbayan sa Mandaue ug Siyudad sa Sugbo.

Gani, sa unang mga adlaw nga sila nakabalik na og dagan niadtong Disyembre 2020, gatuo ang ilang mga miyembro nga makasulod na sila Siyudad sa Sugbo tungod kay gihatagan na sila og special permit sa Land Transportation Franchising and Regulatory Board (LTFRB).

Wa motugot ang Cebu City nga makasulod ang mga PUJ sa Dakbayan sa Mandaue sa ilang naandang rota tungod sa mga kaso sa coronavirus disease (Covid-19).

Karon, sigon ni Geres nga dako kining ikatabang sa mga miyembro nila tungod taas taas na ilang mabyahian, mas daghan na sab nga mga pasahero ang mosakay nila ug mas mutaas ilang kita.

Sigon ni Geres nga adunay 20 kapin ka mga TPUj ang modagan ron sa dakbayan sa Mandaue, 10 niini paingon sa Ayala, laing 10 paingon sa Countrymall ug upat ngadto sa lima ka TPUJ nagdagan paingon sa Manalili.

Tungod sa pagtugot ni Labella, sigon ni Geres nga gilaraw nila nga dugangan pa nila og mga unit ang pabiyahion. Matod niya mokabat na unya og 30 kapin ka mga PUJ nga ubos sa ilang kooperatiba ang mobiyahe.

Sa laing bahin, adunay lima ka mga unit ubos sa Pinagkaisang Samahan ng mga Tsuper at Operators Nationwide (Piston) ang kasamtangang nagdagan sa rota sa gikan sa dakbayan sa Mandaue paingon sa Ayala ug Country Mall. /

Apan wa pa motubag ang Piston kon mopadagan ba sila og dugang.