NAMATAY ang usa ka bayot human sila nagkaaway sa iyang menor nga uyab nga naghikog usab human masayod sa iyang kamatayon.
Way nagdahom sa ilang mga higala nga ang ilang panag-inom sa Biyernes sa alas 3:30 sa kaadlawon sa sityo Cogon, Barangay Poblacion, Dakbayan sa Carcar mosangko sa trahedya nga gikamatyan sa duha.
Ang manag-uyab nga giilang sila si Clint John Pintac, 20, ug Mark Rosal Cañete, 14, gihulagway sa mga silingan nga “loving” ug dugay nang nagkarelasyon.
Si Pintac gituohang giatake sa hubak dihang nidagan pahilayo kang Cañete dihang sila nag-away samtang ang 14-anyos nga gituohang nahadlok nga basulon sa kamatayon sa iyang uyab naghikog pinaagi sa paghigot og pisi sa iyang liog usa ka balay nga gitrabaho pa.
Si Police Staff Seargeant Bernon Gellicania, imbestigador sa Carcar Police Station nga nahinabi sa Superbalita Cebu, nagkanayon nga sila si Pintac ug Cañete nag-inom uban sa ilang mga barkada.
Sa ilang imbestigasyon, ang mga kauban sa duha nga mga menor de edad nitug-an sa kapulisan nga nagkaaway ang duha.
Kini human si Cañete nihangyo kang Pintac nga mang-ulos siya sa cell phone kay duna siyay teksan.
Si Cañete nitug-an sa iyang uyab nga duna siyay teksan nga batan-ong babaye nga gusto nga makigkita niya.
“Nasuko ang uyab nga mahuyang, nagselos. Mao nga nagkaaway sila. Ang menor miilog sa cell phone,”dugang ni Gellicania
Tungod niini, nibiya si Pintac nga nagdagan aron mopauli samtang si Cañete gisultihan sa mga barkada nga apason.
Matod ni Gellicania nga nitubag si Cañete sa mga barkada nga” bahala to siya kay mopauli ra usab kog akoa.”
Dunay mga saksi nga nakakita nga si Pintac nagdagan, apan kalit lang natumba.
Ilang nasayran ni Gellicania nga si Pintact hubakon ug hayan giatake kini atol sa pagdagan ug wa na makaginhawa.
Way foul play nga ilang nakita kay diha ra ang cell phone ug ubang mga gamit, gawas lang sa gamay nga garas sa tuhod nga posibling napangos dihang nadagma.
Matod pa ni Gellicania nga gipangita nila si Cañete, apan wa nila makit-i.
Usa sa mga tanod sa dapit nitug-an sa kapulisan nga iyang nakit-an si Cañete ug gisultihan nga apason sa tambalanan si Pintac kay namatay.
Nakugang sila nga dunay mga silingan nga nipahibawo kanila nga nagbitay si Cañete, naghikot og pisi sa liog sulod sa usa ka panimalay nga under construction sa sityo Dandan mga alas 6 sa buntag.
Si Cañete dali nilang gidala sa tambalanan sa Carcar apan patay nang niabot.
Sumala ni Gellicania nga posibling ang menor de edad nahadlok nga siya ang basolon sa kamatayon sa iyang uyab hinungdan nga nagpakamatay.
Gawas nga loving ang duha, nasayran sa kapulisan nga si Pintac ang tigtubag sa mga class module ni Cañete.