PADAYON ang pag-ubos sa ihap sa mga bag-ong kaso sa coronavirus disease (Covid-19) sa Cagayan de Oro human walo ra ka mga residente ang mipositibo sa Sars-CoV-2.
Ang kinatibuk-ang ihap sa mga kumpirmadong kaso sa dakbayan anaa na sa 3,921.
Matud sa City Health Office, sa walo ka mga bag-ong lokal nga mga kaso, usa ang patay.
Sa 3,921 nga kinatibuk-ang kaso sa Covid-19 sa syudad, 423 ang mga returning overseas Filipino workers/locally stranded individuals (ROFs/LSIs) ug 3,498 ang mga local transmissions.
Aduna nay 134 ka mga aktibong kaso ang Cagayan de Oro diin 44 niini na-admit sa Northern Mindanao Medical Center ug uban pang mga ospital sa syudad, 89 ang mga outpatients, ug usa ang ROF.
Gawas niini, aduna sab natala nga unom ka mga pasyente nga naka-rekober na. Sa karon, anaa na sa 3,599 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 119 ang mga ROFs, ug 3,178 ang mga lokal nga kaso (community: 2,685; Apors: 493).
Niabot sa 188 ang ihap sa mga namatay sa Covid-19 sa siyudad.