Barrita: Gubat batok sa gugma sa panahon sa Covid-19

Barrita: Gubat batok sa gugma sa panahon sa Covid-19

GIPAHIBAWO sa Philippine National Police (PNP) nga badlungon na sa kapulisan ang mga magtiayon ug managhigugmaay kon mag public display of affection (PDA) o magpakita sila sa ilang pagminahalay atubangan sa publiko. Wa nay parayganay, kinuptanay sa kamot, ginaksanay ug hinagkanay sa publiko.

Si PNP Chief General Debold Sinas, nga natakboyan sa Covid-19 ug ubos karon sa isolation, niingon nga hugtan sa kapulisan ang pagpatuman sa social distancing ug ubang mga health protocol aron masanta ang pagkuyanap sa Covid-19.

Asa ka social distancing sa mga magtiayon ug sa mga managhigugmaay? Wa sila masayod kon unsay gipangbuhat nila kon tua sa pribado ug way mga tawong makakita nila? Ngano man, di manakod ang Covid-19 kon di makit-an?

Sa miaging tuig, ang singer nga si Neil Diamond miusab sa lyrics sa iyang kanta nga “Sweet Caroline” alang sa social distancing. Imbis “Hands, touching hands/Reaching out, touching me, touching you,” gihimo niya kining “Hands, washing hands/Reaching out, don’t touch me, I won’t touch you.”

Apan bisan pa sa Covid-19, dihay magtiayon nga hugot gihapon kaayong nagkinuptanay sa ilang mga kamot sud sa usa ka mall. Nakit-an sila sa iyang kumpare. Matod pa sa kumpare, “Believe ko ninyo pre, loving-loving gihapon. Kinuptanay sa mga kamot.”

Tubag sa kumpare nga hugot kaayong nikupot sa kamot sa asawa, “Lisod kaayo kon mabuhian ang kamot ni kumare nimo pre. Di mapugngan, magsigi og pamalit bisan di kinahanglan.”

Gipakisama ni Senate President Pro Tempore Ralph Recto ang pagbadlong sa kapulisan sa PDA sa usa ka deklarasyon sa usa ka “war against love,” gubat batok sa gugma, imbis batok sa Covid-19.

Tingali di na lang apilon ang mga sakop sa pamilya labi na kon sila nagpuyo sa usa lang ka balay. Gawas pa, wa man kaayo mauso sa kultura sa mga Pilipino ang pagpakita sa pagbati sa publiko. Managtago pa man gani sa motel aron di makit-an.

Ang maayo tingali nga ang atong mga opisyal sa kagamhanan maoy mag-display of public affection.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph