SECTIONS
Superbalita Cebu
Thursday, December 02, 2021
SUPERBALITA CEBU

Nadela: Ang bingka nga dawa ni Ria

Asoy Ni

TUNGOD sa bingka nga dawa, nagkaila mi ni Ria sa miaging semana. Wala damha nga samtang nagsulat ko sa atong Asoy karon, nikalit lang siya og agi sa akong tungod dala ang iyang gisuroy nga bingka nga dawa. Si Ria Monteron, 22 anyos, taga Sitio San Miguel, Barangay Uwak, sakop sa lungsod sa Asturias. Ang pagpanuroy og bingkang dawa maoy iyang abag sa biyuda niyang inahan nga si Perla.

Tungod sa pandemiya nabalik siya pagpanuroy dinhi sa dakbayan sa Sugbo niadtong Enero ning tuiga. Labing minos P500 ang iyang kitaon human sa usa ka adlaw nga pagpasingot. Sa usa ka semana mosuroy siya og ka tulo. Ang nakanindot ni Ria kay sa duha niya ka tuig nga pagpanuroy og bingka, ang pagkab-ot og kinaadman wala gyud mawala sa iyang hunahuna.

“Kon makatigum nako Sir, mopadayon ko pag-eskwela. Sige pa man kong tigum kay apas man sab kaayo akong kita para sa akong mama ug sa duha nako ka manghod,” masulob-on nga paambit ni Ria sa kalisod sa iyang kahimtang.

Matod niya, gusto siya nga magmaestra kay kini maoy iyang gipasalig niadtong buhi pa si Papa Renato niya. Subidahon man kaayo kini nga damgo labi na karon nga nag-antos ang katawhan sa pandemiya, apan wala siya kawad-i og paglaum. Basin diay dunay maluoy nga motabang niya pagkab-ot sa iyang damgo nga manudlo sa atong kabataan pohon.

Bilib ko sa iyang determinasyon nga iyang gipaambit kanako pinaagi sa iyang mga pulong nga nakatandog sa akong kasingkasing. Nindot kaayo ang iyang mga pagpasabot. Timaan sa iyang pagka buotan ug pagka matinud-anon.

Diha sa Asturias o sa ubang dapit basin may makatabang ni Ria nga mahatagan og katumanan ang iyang gisaad sa namatay niyang amahan. Alang sa gustong motabang mao ni ang cellphone number nga iyang gihatag nako 0938-223-7392. Amping ug ampo lang kanunay Ria.

Naukay ang netizens sa pasidaan sa Philippine National Police batok niining mga magtiayon ug manag-uyab nga mopakita ngadto sa publiko sa ilang nag-uros uros nga pagbati. Subay daw ni sa kampanya batok sa tinakdanay sa coronavirus. Dili dakpon, igo lang badlongon. Public display of affection kun PDA ang ilang tawag niini.

Sa ato pa kadtong mag PDA, pugong mo diha kay basin mabadlongan mo. Pagka daghan na bang gidili. Hasta mga personal nga gimbuhaton sa mga nagkahigugmaay kalapasan na sa protocol.

May netizen nga nangutana, kon wala na bay laing mabuhat ang atong kapulisan pagpamantay niining mga maghawiranay, biso biso, agbayay, gaksanay, ug uban pa nga sabton nga usa ka matang sa PDA? Kadtong mga uyab o asawa nga moangkas sa motorsiklo unya mogakos kay mahadlok mahulog, apil sab nga idili? Kanang mokalit lang og lipak dala ang makabungog nga dalugdog, unya mokalit og gakos si misis o si love tungod sa kahadlok, dili na sab na pwede kon naa ka sa publiko nga lugar.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!