GISAULOG karong adlawa ang ika-500 ka tuig sa Kristiyanismo sa Pilipinas. Kung mahinumdoman nato sa atong kasaysayan ug sa kanta ni anhing Yoyoy Villame nga "Magellan," nangabot sa Pilipinas ang tropa ni Ferdinand Magellan sa Marso 16, 1521.
Sa libro, ato sab nga nasayran nga gihimo ang unang pagsaulog sa Santos nga Misa sa Pilipinas niadtong tungora didto sa Limasawa ug dayon gibunyagan si Rajah Humabon ug ang iyang mga katutubong gingsakpan sa Cebu.
Apan kontrobersiyal ang lugar kung asa gisaulog ang unang misa.
May mga batid sa kasaysayan nag-ingon nga dili sa Limasawa gihimo kondili didto sa baybayon sa Misau (Misawa) nga sakop sa Butuan dinhi sa Mindanao.
Hasta pa gani ang pagkamatay ni Magellan nga matawag nato nga nasudnong bayani nga si Lapulapu anaa pay mga pangutana. Daghan daw'ng pruweba nga didto sa Butuan unang nidunggo ang nahibiling galleon ni Magellan una sila nilawig pasaka sa Visayas ug nagsabwag sa tinuohang Kristiyanismo sa tibuok nasud.
Si Pope Francis mismo ang nagsaulog sa misa sa Vatican sa anibersaryo sa pagsulod sa Kristiyanismo sa Pilipinas. Siyempre dili palupig ang mga Pinoy sa larangan sa misa kay kontudo awit nga Pinoy ang gigamit hasta ang mga pagbasa sa atong pinulongan pa.
Gipasalamatan sa Santo Papa ang bililhong papel sa Pilipinas nga maoy ikatulong nasud nga may pinakadakong ihap sa mga Kristiyanos sa kalibutan. Gani tukma pa ang dagnay niini nga nag-inusarang Kristiyanong nasud sa Asya.
Iya usab nga giila ang Pinoy sa nahimo niini sa nagkalain-laing nasud sa kalibutan ilabi na ang mga health frontliners nga nakigbisog karon batok sa Covid-19 pandemic.
Gibasa usab ni Antonio Cardinal Tagle, kanhi Arsobispo sa Manila ug karon anaa na sa Vatican ang mensahe sa mga Pinoy ngadto sa Santo Papa dayon sa paghatag niini og dibuho kabahin sa pagsulod sa Kristiyanismo sa Pilipinas.
Matud pa, katapusang bahin sa gibasa ni Tagle nga "Kabalo kami nga nakig-uban kanunay si Lolo Kiko kanamo. Mabuhay!" Sa akong kabahin, mahinuklugon kining kasaulogan dili lamang sa mga Katoliko kondili sa tanang Kristiyanos sa atong nasud.
Para kanako panahon karon sa pagpamalandong, ilabi na nga taliabot na ang panahon sa kuwaresma kung maayo ba ang atong pagka-Kristiyano?
Makapangutana kita, "Kumusta na ang akong pagka-magsusunod ni Kristo?" Gisunod pa nato ang duha ka bulawanong sugo sa Bag-ong Kasabutan nga "Higugmaa ang Diyos labaw sa tanan" ug "Higugmaa ang imong isigkatawo sama sa paghigugma nimo sa imong kaugalingon."
Mora'g simple lamang kining basahon apan baya dali ra sab makalimtan ilabi na kung napuno ang atong kasingkasing sa espiritu sa kasina, kahakog, kawalay respeto sa uban, kasuko, kapungot, kahadlok, pagduhaduha, pagkamapahitas-anon, ulag, ug uban pa.
Kahibalo kita nga lumalabay lang kitang tanan busa miyentras naa pa kita, atong paningkamutan nga mamahimong sulundong Kristiyanos sa atong panahon.
Sa laing bahin, among ipaambit ang among kasubo sa pamilya ni Ms. Alminasa sa Mintal, ni Mr. Lizondra sa Padada, ug Kap. George Tajo sa Callawa. Panaw sa kalinaw ni Kristo!