Giklaro ni billiards legend Efren “Bata” Reyes nga wala siya gidakop sa kapulisan ug barangay officials sa San Pedro, Laguna niadtong Dominggo, Marso 14, 2021 human siya nasakpan nga nagduwa og exhibition game taliwala sa padayong hulga sa pandemya.
Sa interbyu sa programa sa GMA 7 nga “24 Oras Weekend,” gipasabot sa gitawag sab og “The Magician” nga igo lang niyang gikuyogan ang mga tawo nga gipatawag sa barangay officials.
Asoy ni Reyes nga gipahimangnuan ra sila ug gipapauli dayon human niini.
Gipasabot ni Reyes nga giimbitar siya aron moduwa og exhibition game ubos sa pagtuo nga nakakuha na og permit ang mga nagpasiugda. (ESL)