Hayahay, ingnon tang punga, ang mga pulitiko sa Dakbayan sa Mandaue sa pagka karon kay wala pa man tay nakita nga kisaw. Ang dakong bentaha sa liderato ni Mandaue City Mayor Jonas Cortes tungod kay walay nasagul nga oposisyon sa iyang konseho. Gani, hangtod karon wala pa gidungog kon duna bay moatbang sa pundok ni Mayor Cortes sa piliay unya sa Mayo 9, 2022.
Samtang sa Dakbayan sa Cebu, klaro na ang liki sa pundok ni Cebu City Mayor Edgar Labella ug Bise Mayor Mike Rama. Gani, sa miagi pa nga piliay unta modagan pagka mayor si Bise Mayor Rama apan napugngan lang siya tungod sa isyu ni Presidente Duterte batok kaniya. Dako ang posibilidad nga tulo ang kandidato pagka mayor unya sa dakbayan sa Sugbo. Si Mayor Labella, si Bise Mayor Rama ug kandidato sa BOPK ni kanhi mayor Tomas Osmeña.
Apan kon banhawon ni Mayor Labella ang iyang dugay na nga pangandoy nga magkongresista sa Cebu City north district, basin og duha ra unya ang mag-atbang nga kandidato pagka mayor sa dakbayan sa Sugbo. Di pa ko mahikalimot sa among panagtabi ni Mayor Labilla niadtong panahon (di lang ko mohisgot sa tuig. lol!) nga news reporter pa ko ani nga pamantalaan ug samtang si Mayor Labella director pa sa Visayas Ombudsman.
Diha pa sa Palace of Justice ang opisina kaniadto sa Ombudsman. Sa akong pagpangita og balita, nakit-an ko ni Mayor Labella ug iya ko nga gitawag sulod sa iyang opisina. Diretso iyang pangutana nako og duna ba siyay higayon nga modaug kon modagan siya pagka kongresista sa north district batok ni ni anhing Kong. Raul del Mar. “Ayaw lang, Nyor. Pagkonsehal lang usa”, mao ang akong tubag nga way likoliko kay niadtong panahona hugot kaayo ang liderato ni Kongresista Del Mar sa north district.
Tinuod man, nidagan ug nidaug pagka konsehal si karon Mayor Labella ubos sa Partido BOPK. Karon, nga wala na si Kongresista Del Mar, dako ang purohan nga modaug si Mayor Labella pagka kongresista sa north district labina nga gubot pas lukot ang ilang Partido nga kowalisyon sa PDP-Laban ug Barug Party-Team Rama, nga gitukod ni Bise Mayor Rama niadtong panahon nga mibuwag siya sa BOPK unya midagan ug midaug siya sa iyang ikaduha nga termino batok ni mayor Tomas. Apan napildi si Rama sa iyang ikaduha nga pakigharong ni Mayor Tomas niadtong 2016 nga piliay.
Bisan kon wa pa gipalutaw unsay plano ni Mayor Labella sa sunod piliay, apan sa akong tan-aw kon magpadayon ang di maayong relasyon-pulitika nila ni Mayor Labella ug Rama, ang modagan pagka kongresista maoy pinakamaayo nga desisyon alang ni Mayor Labella tungod kay mao man sad ni ang iyang damgo kaniadto pa. Misamot ang labad sa ilang pundok kay si kanhi konsehal Joey Daluz nibiya sa Barug ug iyang gibanhaw ang Panaghiusa, ang Partido kaniadto ni anhing undersecretary Inday Nita, ang inahan ni Joey, samtang gibuhi usab ni Kon. Raymond Garcia ang Kusug, ang Partido ni kanhi mayor Alvin Garcia, amahan ni konsehal Garcia.