Usa ka ordinansahon nga dugay nang gisalindot sa Konseho ning dakbayan ang gibanhaw karon sa usa ka konsehal. Si Konsehal Nestor Archival nangamahan pag-usab sa proposed ordinance nga himoong rekisito ang pagtanom og duha ka mga kahoy sa gustong magpakasal sa dili pa sila isyuhan og marriage license sa City Civil Registrar’s Office. Si kanhi konsehal Nida Cabrera ang unang nisang-at ini mga 10 na ka tuig ang nakalabay.
Ambot og unsay nasulod sa utok ni Archival nga iya mang gisang-at og balik nga gisalindot naman unta kini sa kanhi Konseho. Sa dihang gituki kini niadtong panahon ni Cabrera, si Civil Registrar Evangeline Abatayo misupak niini. Matod ni Abatayo nga lain lang kining tinubdan sa kurapsiyon. Kay matod pa niya nga mohatag na lang og suburno ang kaslunon sa mga personnel sa Civil Registrar’s Office aron makakuha og license bisan wa motanum og kahoy.
Makapakunhod usab kini sa ilang kita kay adto naman unya sa ubang local government units (LGUs) mo-apply og marriage license ang mga kaslonon kay hasol kaayo sa dakbayan. Adunay mga parokya mi-imponer na ani. Para nako nganong lisud-lisuron man god ning mga kaslunon.
Unsa man gyud ang tumong ni Archival? Ang kanhi Presidente sa America nga si Dwight Eisenhower miingon: ‘Motivation is the art of getting people to do what you want them to do because they want to do it.’ Ang Binisaya anang motivation mao ang katuyuan o tinguha. Buot ni Archival nga himuon usab unta nga motivation o katuyuan sa mga magpakasal nga makapananum silag kahoy isip dugang sa labing dako nilang tinguha nga magpakasal. Kutob lang ta sa pagpananum isip compliance. Kinsa may momatuto anang ilang gipananum?
Ug kana ang problema sa konsehal kon unsaon pagkombensir kining mga tawhana nga mahigugma usab sa kalikupan sama sa ilang paghinigugmaay. Unsaon sila pagkumbensir nga kining ordinansa nga iyang gipasiugdahan dili mahimong babag sa balaan nilang katungod ug tinguha ‘to live happily ever after.’ Gumikan sa kahasol, mao na lang unya kini ang himuon nga rason nga dili na magpakasal, mag-live in na lang. (bobbygnalzaro@gmail.com)