MADAWAT na sa libuan ka mga senior citizen sa dakbayan sa Sugbo ang ilang P3,000 nga ayuda sugod sa Marso 27, 2021.
Kini ang gipahibawo ni Mayor Edgardo Labella para sa buwan sa Enero, Pebrero ug Marso.
Ang City Government mihatag og P12,000 matag tuig ngadto sa mga kwalipikado nga nag-edad og 60 pataas.
Si Labella nipahibalo nga ihatod sa mga balay ang maong hinabang sama aa naandan nga paagi sa pagpanghatag sa siyudad dihang nagsugod ang pandemiya sa Coronavirus disease 2019 (Covid-19).
“House-to-house gihapon ang pagahimuon nga distribution sa financial assistance alang sa mga senior citizens aron masiguro nga luwas sila sa Covid-19 ug masunod gihapon ang minimum health protocol,” tipik sa post sa Public Information Office Facebook page.
Para sa 15,000 ka senior citizens, kinsa unang nahatagan og cash card gikan sa Land Bank of the Philippines, ang P3,000 nga ayuda direkta nga isulod sa City Treasurers Office sa ilang account para ilang makubra sa mga automatic teller machine (ATM).
Gipaningkamotan sa administrasyon ni Labella nga mahatagan og cash card ang kapin 80,000 ka mga senior citizens aron ilang makobra ang ayuda matag buwan balor og P1,000 sa mga ATM.
Sa mosunod nga mga semana, isunod usab og hatag sa City Government ang ayuda para sa kapin o kulang 12,000 ka persons with disability (PWDs) sa dakbayan, kinsa ayudad sa sama sa mga lolo ug lola, makadawat usab sila og balor P12,000 matag tuig. (PAC)