Lapu mihatag og 560 ka sets sa solar panels sa Pangan-an

MIAPOD-APOD og 560 ka solar panel sets ang Kagamhanan sa Dakbayan sa Lapu-Lapu ngadto sa mga residente sa Brgy Pangan-an, isla sa Olango, niadtong Marso 13, 2021.

Kini ang gipahibawo ni Lapu-Lapu City Mayor Junard "Ahong" Chan sa mga tigbalita.

Ang solar panels giapod sa matag balay sa dapit aron ilang magamit panahon sa kagabhion.

Kasagaran sa mga residente sa lugar walay kaugalingong suga samtang ang uban nga aduna, magbayad pa og P15 ngadto sa P25 kada adlaw sa mga nanag-iya og generator, apan kutob lang sa alas 11 sa gabii ang supply.

Ang usa ka solar panel nga gihatag adunay upat ka LED lights nga may tagsa ka switch nga mahimong mabutang sa sala, kwarto, kusina ug gawas sa balay.

Aduna kini pakapin nga smartphone connector nga mahimong maka charge ang cellphone ug adunay 3-year warranty, diin mahimo kining mapaayo nga libre ang serbisyo kon dunay deperensya.

Gawas sa mga solar panel, mas hayag na usab unya ang kadalanan sa dapit human nga adunay moabot sa 80 ka mga solar street light ang gitaod usab sa kagamhanan.

Pinaagi niini, hayag na ang mga lumolupyo nga maglakaw panahon sa kagabhion sanglit aduna na may suga matag 25 metros sa karsada. (GCM)