NORTH COTABATO -- Naglusad og lihok protesta ug nagbarikada ang mga molupyo nga Manobo sa tiilan sa Mt. Apo niadtong Lunes, Marso 15, sa siyudad sa Kidapawan.
Gihulagway nga gibabagan sa mga nagprotesta ang dalan pasaka ngdato sa EDC.
Nahitabo ang protesta tungod sa tinguha sa mga tribung Manobo nga makuha nila ang 20 percent royalty share sa Energy Development Corporation (EDC).
Nasayran nga ang 20 percent o katumbas sa dul-an P7 milyon to P8 milyon nga bahin gikan sa EDC ang gi-download sa Manobo Apao Descendants sa Ancenstral Domain sa Mt. Apo (Madadma).
Apan sa lebel sa Madadma, five percent lang ang gitagana sa gatusan ka mga tag-iya sa yuta, butang nga wala gipatin-aw sa 116 nga mga tag-iya sa yuta nga karon sakop sa EDC.
Nagpatiwala na ang National Commission on Indigenous People aron hisgutan ang mulo sa mga tag-iya sa yuta sa maong lugar.
Nasayran nga ang 701 ektarya nga nahimutangan sa EDC gipanag-iyahan sa nagprotesta nga mga lumad.
Sa pagsuwat ning balita, nagpadayon ang negosasyon aron matapos na ang problema tali sa EDC ug mga lumad nga Manobo. (Edgar E. Fuerzas)