SECTIONS
Pampanga
Saturday, October 23, 2021
PAMPANGA

Garcia: Panananaman karing Mula king Panaun ning Makayawang Sakit a Panglaganas (Gardening During the Time of Pandemic)

Kapisik

“MINUKYAT ku king saresa, sangkan-sangkan magpaynawa,

nung ating ayup a dugpa, barilan ke king pistola.

E mu ne sa babarilan, ing ayup kung pakamalan,

seli ke pang limang-dalan kang Maryanung Baritaklan.

O bakit e ke barilan, makasira yang tanaman,

pilan na lang asira na, adwa na lang pulu’t lima.

Ing baril kung e mamakbung

sinungab ya lalam danum.

Karin ya pin pakbung-pakbung

Payntunan ne i Apung Gundang.

-- Mipampan a Talasulat, “Saresa” Senayang Dalit Kapampangan

“O patag a bunduk, kukulate dutung,

masetas ning saging, balag niung balatung.

Tinanam kung mangga, memunga yang santul,

ing gayndu kung sisi, tandang yang mangebun.”

-- Mipampan a Talasulat, “O Patag a Buynduk”, Senayang Dalit Kapampangan

“Tinanam kung kamantigi, libutad na ning paligi.

memunga ya’t menyalapi, uli ning sintang malati.

Ing baril kung e mamakbung, susuklab ya lalam danum,

Manikwa yang susung dagul, bulung lara ampong kangkung.

Tinanam kung pakayungkung, libutad na nitang payung,

mamunga ya’t manyalapung, uli ning sintang maragul.”

-- Mipampan a Talasulat, “Tinanam kung Kamantigi”, Senayang Dalit Kapampangan

***

King kasalungsungan mikakamal ing gule, mikakamal ing sablang pamangan at pagsamantalan da ring mamunan iti uling ala lang akarapat bina reng memalen neng ing pamangan bisa la’t ali kaylangan ya bang bumye ya ing ninu man. Ing gule bala karni na naman alus presyu at ala yang akarapat ing kapamalan uli ning nanu mang sangkan. Panakitan da reng mapilan ing panaun ning makasawang sakit.

Makanyan man, dakal pa malyaring gawan a paralan bang e ta binang mituran keng kemalan ning panyaliwan. Mataba ing gabun tamu anting Kapampangan uli ning menibatan ing gabun ning lalawigan keraklan keng lahar o abung menibatan keng pamamakbung ning Pinatubu, agya mang inyang minuna ala tamung akakit ikakayap ning lahar.

Deng mula tamung mengabalagan abu metaba la para king pamananam miyayaliwang tanaman–e mu deng manyampaga nung e pati na ring mamunga at gugulayan a tanaman. Mibalugse ka mu pin butul gule o bungang tanaman e ka maynip tumubu la. Ating mananaman kareng pasu, lumang tapayan, datukanan danum, latang pibatan biscuit at nanu-nanu pa.

Maglakwan ka mu at tambunan mu lang ditak deng bini o butul saguli tumubu la agyang e mo man binang pakatugtugan danum o dirinang sangkap pampataba o fertilizer. Nung miyayalbugan la, malyari mu lang itas lagpus keng pekamatas nang darasan ning albug o gawa kang tumpakan a gawa keng kwayan a matwa bang matibe la deng tumpakan a reti.

Nung matas ya ing bale mu at makasimentu ya malyari ka namang mananaman keng babo yung bubungan lalu na retang e maselan keng pali uling nung ken lang bubungan malanat la keng pali ning aldo. Atin kasing buri da ken lang mababang dane ning mula at e da buri ing malambat at masikan a aslag ning aldo kasi makapanat ing pali para karela.

Kamatis, sibuyas, okra, pechay, balasenas, kulitis, laya, bawang, larang inanis, larang dagul o larang panyigang, kangkung o gandus nung keng parating makababad keng danum a dake ning mula. Alus gule o sangkap pamaglutu malyaring itanam kareng mula, pakasabit o pakaangyang o agyang babo bubungan.

O’t paysakit ka buntuk keng kemalan ning gule nung aitn na ka mang malyaring gawang paralan ne, abe?

***

Dake Talabaldugan:

1. mipakde (pangdiwa) milingat, migising, mikasangkan bang kimut gunyat o magmasabal. English - arouse, awake, awaken, arouse, rouse, stir, jump, stand, mount, rise and shine, be inspired, get going, enliven, liven up, perk up, gussy up. Alimbawa king pamangamit: “Mipakde ka–balen a meyalipan–uling mitda nang unabis ing kekang tagimpan!”

2. mipaldan (pangdiwa) mikakapaldanan, milako sakit, kumayap king sakit, mayulu. English - recover, revivify, get well, be healed or cured, get remedied, restored to wellness, meliorate, reinvigorate, make better. Alimbawa king pamangamit: “Nung bisa kang mipaldan agad mangan kang sagiwang gule at bungang tanaman at inuman mu ing panulu mung masalese at ganap.”

3. mipalingat (pangdiwa) mipagising bigla king malalam a pangatudtud atin o alang ginising o meging sangkan bang migising. English - to wake up instantly without intending to do so, be aroused or roused spontaneously. Alimbawa king pamangamit: “Mipalingat ya libutad ning kapitangan bengi karing sisyak a kabag a magpasasa karing bunga nang tanaman Bining.”

4. mipalit (pangdiwa) milibe, miliwas bibye o pagkalub/kabilyan o panamdaman. English - to swap, exchange, bandy, trade, reciprocate, give and take, barter, switch, interchange, trade-off. Alimbawa king pamangamit: “Mipalit la susulud a balat ding baka ila ning damulag inya kanu ing metung lugaluggangang, ing aliwa asna kaskup.”

5. mipalako (pangdiwa) meko e sasaryan o laban king pilubluban o kapagnasan, biglang pamaglako pauli ning biglang sangkan. English - leave or depart suddenly due to a drastic reason or forced impetus. Alimbawa king pamangamit: “Mipalako ya ing dalo karatang-datang pa inyang dindam nang e la tatanggap ninu man a e da kabalen ding magtaung Ilukanu.”

***

Sadyang gawi da reng Kapampangan

Nung e ka meyagkat, e ka sukat tatagun. Antita ing gawi da ring kabalen inyang minuna uling e mayap ing kabud na lalsut king metung a pamagtau nung alang menagkat keka. Tuturing ding Kapampangan a dangalan ing mayagkat at managkat karing paulagan dang kakilala, kakaluguran o ninu man a karelang tatangalan a tau, inya sa’t buri da lang akakasulu deti king nanu mang pamitipun o kapagmasusyan—kayaldawan, binyag, kasal o nanu mang maulagang aldo para karing kabalen. Kapangangasan ing kabud na palto king nanu mang pusyun a e ka meyagkat kaninu man.

Ing kasalungsungang panaun, lalu na inyang ala pang makayawang sakit, ating mapilang tau ing kabud na tumagun agyang alang panagkat karing magtau. Milako na ing aswan dang “delikadesa” at bala ala nang malamarine karing mapilan kabud mu makapakipangan la.

Metung a gawi iting mekalingwan na naman ne, abe?

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph