Diputado: Ang kaguliyang sa PDP-Laban

Daghan ang nagtuo nga nagsugod na og kisaw ang kampanya sa mga kandidato pagka-presidente sa sunod tuig nga piniliay.

Usa na niini ang giingon nga tandem nila ni Senador Bong Go ug Pres. Rodrigo Roa Duterte (PRRD) ubos sa bando sa PDP-Laban.

Laing grupo nga nabaniog sab mao ang tandem nila ni Senador Manny Pacquiao ug ni Senador Grace Poe.

Laing grupo pa gyod mao ang tandem nila ni Riza Hontiveros ug ni Antonio Trillanes.

Nagpaabot pa ko nga mogawas ang pangalan ni VP Leny Robredo ug sa iyang tandem.

* * *

Sa miaging semana, didto sa Dumaguete City, usa sa gibuhiang pamahayag ni Senador Bong nga dili siya modagan pagka-presidente tungod kay di pa angay hisgotan ang piniliay pero midugang siya nga mamahimo lang siya modagan pagka-presidente kon si PRRD ang modagan pagka-presidente.

Buot ipasabot, kon manganak kining gihimong kampanya karon sa mga sakop sa PDP-Laban pagsuporta sa petisyon nga molansad si PRRD pagka bise presidente, madayon gyod si Go sa iyang gisulti nga modagan pagka-presidente sa 2022.

Nganong manganak man?

Tungod kay aktibo kaayo karon si PDP-Laban chairman Al Cusi sa pagsuroysuroy sa mga PDP-Laban chapters sa tibuok nasod aron pagpagawas sa maong petisyon.

Ug mao sab kini hinungdan ngano nga wala malipay si Pacquiao sa gihimo ni Cusi, matod pa niya, namolitika na si Cusi bisan sunod tuig pa ang piniliay.

Kon dili mahilot kining maong “drama,” hayan mabahin ang PDP-Laban sa grupo ni Cusi ug grupo ni Pacquiao.

* * *

Sa panahon pa ni kanhi senador Nene Pimentel, lig-on kaayo ang PDP-Laban, labi na kon loyalty na ang hisgotan.

Dili sayon ang pagsulod, ug panagsa lang madungog ang usa ka miyembro nga mohawa sa grupo. Pero sa dihang mipuli si Koko Pimentel sa iyang amahan, nahimong barato na lang ang pagpa-miyembro sa PDP-Laban.

Bisan kinsa na lang ang mahimong PDP-Laban. Diha gani panahon nga ang nag-administer sa oath sa mga bag-ong miembro sa grupo nag-shorts lang.

Sa kinaraan pa, nahimong lima singko na ang pagka-miyembro sa PDP-Laban, dali ra kaayo nidaghan ang mga sakop niini, og kadtong mga sakop nga misunod sa lagda sa pagpa-miyembro dali ra kaayo gipapha sa mga sakop nga matawag og “tomatik” o “instant.” Lahi na ang PDP-Laban karon.

* * *

Modayon ba kaha si Manny Pacquiao sa iyang plano pagdagan pagka-presidente kon mo-grabe kining “kaguliyang” karon sa PDP-Laban?

Madayon ba kaha kining gikampanya nga petisyon sa PDP-Laban alang sa pagka-bise presidente ni PRRD?

Kon anaa na kining maong petisyon, makakombinsi ba kaha kini ni PRRD pagdagan isip bise presidente sa nasod?

Kon pananglit modayon paglansad si Davao City Mayor Sara Duterte-Carpio pagka-presidente, unsa man kahay mahitabo?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph