Editorial Cartoon by John Gilbert Manantan
Editorial Cartoon by John Gilbert Manantan

Editoryal: Sakto si Jonas

Si Mandaue City Mayor Jonas Cortes nipadayag nga gustong makigtagbo sa mga mayor sa mga Dakbayan sa Sugbo ug Lapu-Lapu aron pagpatuman sa managsamang oras sa ilang curfew aron walay lusot ug kalibog sa mga lumolupyo.

Sakto si Cortes. Gani, mas maayo nga maapil usab ang ubang kasikbit nga local govenment units (LGUs) sa Metro Cebu sama sa Dakbayan sa Talisay, Lungsod sa Cordova ug Lungsod sa Consolacion.

Nakapanamin seguro si Cortes sa gihimo sa mga mayor sa Metro Manila nga nipatuman sa uniform curfew tali sa 16 ka mga dakbayan ug usa ka lungsod sa paningkamot nga mapaubos o masanta ang nagkataas nga kaso sa coronavirus disease 2019 (Covid-19) sugod niadtong Marso 15, 2021.

Si John Eddu Ibañez, executive secretary sa mayor sa Mandaue, nagkanayon nga nakita ni Cortes nga maayo ang gihimo sa Metro Manila ug mawala usab ang kalibog sa mga nanagpuyo o nanarbaho sa nagsikit nga LGUs.

Ang Mandaue nipatuman sa curfew schedule gikan sa alas 11:00 sa gabii ngadto sa alas 4:00 sa kaadlawon. Sa Cebu City, ang curfew gikan sa alas 11:00 sa gabii ug motapos sa alas 5:00 sa buntag. Samtang, ang Lapu-Lapu, gikan sa alas 10:00 sa gabii hangtod sa alas 5:00 sa buntag.

Hinaut nga magkasabot sila sa mas daling panahon.

Kini nga sitwasyon dayag nga ehemplo nga nagkinahanglan na ang tanang LGUs sa Metro Metro dunay usa ka kahugpongan nga mopahan-ay sa koordinasyon sa pagpatuman sa batakang serbisyo sa katawhan.

Ang problema sa drainage o baha, basura, trapiko, zoning ug bisan ang kriminalidad magkadugtong kini. Walay pulos o dili epektibo kon mag-iyahay sa paghimo og solusyon. Maayong malangkubon ug malahutayon pinaagi sa kahiusahan.

Ang isyu sa curfew dili dakong problema apan nagpakita kini sa kamahinungdanon sa koordinasyon sa LGUs sa Metro Cebu.

Related Stories

No stories found.
SunStar Publishing Inc.
www.sunstar.com.ph