WALA makaabot og 10 ang bag-ong kaso sa coronavirus disease (Covid-19) sa Cagayan de Oro human pito ra ka mga residente ang mipositibo sa virus, sumala sa report sa City Health Office sa dakbayan.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3,951.
Sumala ni City Health Officer Dr. Lorraine Nery, sa pito ka mga bag-ong lokal nga kaso, upat niini ang mga lokal authorized persons outside residence (Apors) ug tulo ang mga local index nga mga kaso.
Sa 3,951 nga kinatibuk-ang kaso sa Covid-19 sa syudad, 423 ang mga returning overseas Filipino workers/locally stranded individuals (ROFs/LSIs) ug 3,528 ang mga local transmissions.
Ang Cagayan de Oro adunay 150 ka mga active cases, 55 niini na-admit sa Northern Mindanao Medical Center ug uban pang mga ospital sa syudad, 94 ang mga outpatients, ug usa ang ROF.
Walay natalang mga Covid-positive nga mga kaso nga naka-recover. Nagpabiling 3,613 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 119 ang mga ROFs, ug 3,192 ang mga lokal nga kaso (community: 2,696; Apors: 496).
Ang recovery rate sa Cagayan de Oro anaa na sa 91.44 percent.
Ang ihap sa mga namatay sa Covid-19 sa syudad naa sa 188.