Gikatahapang banggiitang kawatan nga bag-ohay lang nakabiktima sa Dakbayan sa Talisay ug sa pipila ka mga lungsod sa habagatan nadakpan sa hot pursuit sa kapulisan sa Martes sa gabii, Marso 16, 2021 human mailhi pinaagi sa closed circuit television (CCTV) camera sa iyang biktima.
Ang suspek nga giilang si Chardwen Catipay, 19, taga sityo Lower, Barangay Mohon, Dakbayan sa Talisay didto na maabti sa kapulisan sa sityo Tabunan, Barangay Tangbo, Samboan, habagatang Sugbo.
Matod ni Talisay City police chief Lt. Colonel Gerard Ace Pelare, si Catipay maoy responsable sa mga pagpangawat sa mga balay sulod sa mga subdivision sa dakbayan, mga lungsod sa Dalaguete ug Samboan.
“During the investigation, the suspect has committed series of burglary in Talisay in the past months victimizing subdivision owners. It was also found out that he has committed the same crimes in Dalaguete and Samboan , thus, his arrest will result in the solution of the spate of robbery incidents in these places,” matod ni Pelare.
Si Pelare niingon nga niadtong Marso 15 sa mga alas 5 sa hapon, nanawag sa ilang buhatan si Mark Anthony Cabras, 24, taga Cansojong sa dakbayan nga siya gikawatan.
Nakuha gikan kaniya ang Lenovo laptop, cell phones ug uban pa. Pinaagi sa pag review sa CCTV footage, ilang nailhan si Catipay, kinsa atol sa giingong pagpangawat nagsul-ob og itom nga jacket.
Klaro kaayo ang panagway ni Catipay sa CCTV hinungdan nga ilang nailhan.
Ila dayon nga gipangita si Catipay sa mga lugar nga iyang kanunay nga tambayan hangtod nga ilang nasayran nga nidangop kini sa Samboan hinungdan nga sila nakig-coordinate sa Samboan Police Station.
Nabawi gikan kang Catipay ang usa ka Lenovo laptop, duha ka mga cell phone, usa ka Canon camera, relo nga Michael Kors ug usa ka plantsa. Nasakmitan usab siya og lima ka mga putos sa gituohang shabu.
Gidala si Catipay sa Samboan Police Station alang sa booking.
Si Talisay City Mayor Gerald Anthony Gullas Jr. nalipay human masayod sa pagkasikop ni Catipay. (REV)