MAAYONG adlaw mga SuperSuki sa Superbalita.
Ato sa nga ipadaplin ang hisgutanan kalabot sa Covid-19 ug sa politika. Ato lang nang balikan sunod nga panahon.
Uyon ba mo nga dili dapat bendisyonan ang kaminyuon sa parehang matang -- lalaki sa lalaki ug babaye sa babaye -- ugaling magkasabot sila nga magminyo?
Lagmit ikasagmuyo kini sa mga sakop sa lesbian, gay, bisexual, transgender (LGBT) sa atong nasud nga dunay 107 milyon nga sakop nga nagdahom nga makaambit na sila sa panalangin nga ihatag sa simbahang Roman Catholic human sa pagpadayag ni Pope Francis nga uyon siya sa pag-uban o paghiusa sa kaminyuon sa same sex o same sex marriage.
Otsenta porsiyento sa 107 milyon nga LGBT sa atong nasud, mga sakop sa Roman Catholic church.
Daghan ang nagdahom nga bongga nga kasal labi na sa mga suot ang masaksihan panahon nga LGBT ang mopaso kay nailhan sila sa kabatid sa pagpatahom bisan pa sa mga butang nga daw laksot nga tan-awon.
Giklaro sa Vatican Orthodoxy Office nga dili bendisyonan sa kaparian ang bisan kinsa nga magminyo nga pareha ang sex kay supak sa gipahimutang nga plano sa Diyos nga ang kaminyuon alang lang sa lalaki ug babaye.
Sa tibuok kalibutan duna nay 29 ka nasud diin legal ang kaminyuon sa pareha og sex, tungod kay katungod kuno sa tawo ang pagpili kinsa ang iyang ikauban sa iyang kinabuhi samtang alang sa uban, daw pangirugan sila nga maghunahuna kay ngil-ad sa ilang panglantaw.
Sa mga nasud sa Asian, bugtong ang Taiwan lang ang naglegalisa sa same sex marriage.
Kon Bibliya ang atong pasultihon, alang ra gyud sa lalaki ug babaye ang kaminyuon ug gitahasan sa Diyos nga mosanay, lalaki ug babaye nga gihiusa apan giingon sa Bibliya nga usa ra sila ka unod, Matthew 19:4-6.
Ang kaminyuon dili lang diha sa dokumento nga papel nga atong ginahuptan apan usa ka sagrado nga gasa gikan sa Diyos diin ang buhat sa pakighilawas mamahimong bililhon sab nga gasa sa asawa ngadto sa iyang bana ug ang bana sab ngadto sa iyang asawa.
Daghan sab karon ang legal nga panag-uban diha sa papel apan sa tago nagalapas sa gipanumpaan nga pagkamatinud-anon ngadto sa kapikas sa kinabuhi kay duna pa may lain nga ka-relasyon.
Daghan ang nabungkag nga kaminyuon tungod ang pagbati sa kauwag mao lang ang basihan sa relasyon.
Daw wala nay bili ang moralidad sa katawhan karon tungod bisan sa hut-ong sa mga batan-on atong makita ang ginatawag nga "unwanted pregnancy" bunga sa pagpakighilawas nga gawas sa kaminyuon.
Kon atong ibalik sa kasaysayan sa Bibliya, same-sex relation ug mga binuhatan ang usa sa hinungdan nga gilamoy sa kalayo ang Sudom ug Gomorrah diin nahimong haligi nga asin ang asawa ni Lot.
Sa atong yano nga pagsabot, mahimong buhaton sa tawo, LGBT unsa man ang atong gusto apan adunay labaw nga Makagagahum nga nagatan-aw ug magahukom, uyon ba sa iyang kabubut-on ang atong mga buhat.
Mahimo man nga legal atubangan sa gobyerno ang atong relasyon, ang pangutana, legal ba sab ug gikahimut-an ba sa Ginoo ang atong mga binuhatan? Kon ugaling duna man bendisyon sa simbahan ang same sex marriage, duna ba sab bendisyon nga maangkon gikan sa Kahitas-an?