I'm sorry: Reyes

Nangayo og pasaylo si billiards legend Efren “Bata” Reyes sa iyang pagsupak sa health and safety protocols diin miduwa siya og usa ka exhibition game taliwala sa padayong hulga sa Covid-19.

Si Reyes, 66, nakita sa usa ka video nga gi-post sa social media nga nagduwa og billiards sa San Pedro, Laguna niadtong Marso 11, 2021.

Ning panahon sa pandemya, ang senior citizens nga sama ni Reyes hasta ang mga batanon nga nag-edad og 15 anyos ug paubos, gidid-an nga mogawas sa balay gawas lang kon mahinungdanon ang tuyo niini.

Si Games and Amusements Board (GAB) chairman Baham Mitra nipadayag nga posibleng mopahamtang sila og silot sa gitawag sab og The Magician tungod sa gibuhat niini.

“He’s a GAB licensee and we’ll call him to shed light on what happened. And if he needs to be suspended, then he will be suspended for not following health protocols,” matod pa ni Mitra sa taho sa Manila Bulletin.

Gipasabot ni Reyes nga iyang gihanyo ang mga nagpasiugda sa exhibition game nga mangayo og permit sa local government una niya gidawat ang imbitasyon.

Matod ni Reyes nga nasayod ang barangay captain sa maong kalihukan ug kanunay niyang gipahimangnuan ang mga tawo nga ningtan-aw sa duwa nga tumanon ang social distancing ug safety protocols.

Nidugang si Reyes nga sa pagsugod, hapsay ra ang dagan sa duwa gumikan kay gamay ra ang mga nanan-aw apan dihang ningkatap ang taho kabahin sa iyang presensya, hayan kalit lang midagsa ang mga tawo.

Asoy ni Reyes nga wala na nakontrolar sa mga nagpasiugda ang pagdagsa sa mga tawo ug wala na natuman ang social distancing hinungdan nga nitawag na og kapulisan ang barangay captain.

Giklaro sab ni Reyes nga wala siya gidakop sukwahi sa gituohan ug igo lang siyang gipakuyog sa kapulisan paingon sa baragay hall aron pahimangnuan ug gibuhian ra dayon siya human niini.

Gipasabot ni Reyes nga nakapadangat na suwat sa GAB aron pormal nga ipadayag ang iyang pagpangayo og pasaylo.

“I am deeply sorry for what happened, I don’t have control over the situation and the people around the vicinity. I, myself, was well aware of the safety and protocols so that I will not acquire this virus and I’m hoping and praying fo everyone’s safety,” tipik sa suwat ni Reyes ngadto sa GAB. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph