Nakaduso na sa ilang motion for reconsideration ang kampo ni Mayor Edgardo Labella ug Acting Administrator sa Local Water Utilities Administration (LWUA) labot sa giluwatan nga temporary restraining order ug reinstatement ngadto sa Regional Trial Court (RTC) Branch 7 sa Cebu City.
Kini ang pamahayag ni Board Chairman Jose Daluz III sa Metro Cebu Water District Board of Directors human nipabor si Judge James Stewart Ramon Himalaloan sa petisyon sa kampo nilang Atty. Ralph Sevilla, Atty. Cecilia Adlawan ug Augustus Pe Jr., kinsa gipangtaktak sa pagka BOD niadtong Oktubre 2019.
Si Daluz nipasalig sa publiko nga dili maapektohan ang serbisyo sa MCWD taliwa niining nitumaw nga isyu, apan iyang napanglantawan nga malangan ang implementasyon sa mga proyekto.
Lakip sa posibleng maapektohan ang desalination project diin gikatakda unta nga magpinirmahay na ang MCWD ug contractor nga nidaog sa bidding.
Ang RTC Branch 7 niisyu og 20 ka adlaw nga TRO sugod kagahapon, Marso 16, 2021 hangtod ma-resolve ang petisyon nga gipangayo sa kampo nilang Pe.
Ang Branch 7 adunay ipahigayon nga hearing karon, Marso 18, alas 2 sa hapon aron maduso sa kampo nilang Pe, Sevilla ug Adlawan nga gi-representahan ni Atty. Amando Virgil Ligutan ug kumbinsehon ang korte para paboran ang preliminary injuction.
Paglabay sa usa ka semana, Marso 25, isunod usab ang hearing para sa mga defendant diin hatagan sila og higayon nga makapresentar usab sa ilang mga ebedinsya kon nganong dili angay hatagan og injunction ang kampo sa plaintiffs. (PAC)