Kapulisan sa Siyudad sa Sugbo magtigum uban sa Emergency Operations Center (EOC) ug Simbahang Katoliko aron tukion kon angay ba nga tugotan ang Visita Iglesia sa dagkong mga simbahan atol sa Semana Santa.
Si Palma namahayag nga bukas ang tanang simbahang Katoliko alang sa Visita Iglesia sa Semana Santa. Apan kinahanglan pa kining tukion sa tigom sa tigom sa Huwebes, Marso 18.
Matod ni Police Colonel Josefino Ligan, hepe sa Cebu City Police Office (CCPO), wa siyay pagsupak sa pamahayag sa arsobispo, apan kinahanglan nga desisyonan una kini sa Inter-Agency Task Force (IATF).
Kon unsa man ang hukom unya sa mga sakop sa EOC, ila kining ipahibawo ngadto kang Palma aron hapsay ang ilang pagpatuman sa siguridad, ilabi na nga taas pa kaayo ang mga kaso sa coronavirus disease sa Siyudad sa Sugbo.
“Hisgutan na sa EOC. Subject for deliberation kon unsay ma padayag, ma come up nga hiniusang desisyon sa EOC. Mao nay atong ipatuman,” matod ni Ligan.
Apan gipahibawo ni Ligan nga ang mga relihiyosong kalihukan sa gawas sa simbahan sama sa Station of the Cross hugot nga gidili tungod kay lisud ang pag kontrolar sa mga tawo nga mosalmot.
Bahad niya nga kon adunay mga barangay official nga mohimo niini, ila kining ipa hunong.
Kon di mopatuo, ila kining dakpon ug pasakaan og kaso ngadto sa korte.
“Kanang mga religious activities sa barangay sayod ta ana wala nay approval gyud sa EOC, ato gyud nang badlungon,” sigun ni Ligan.
Dugang niya nga ang usa sa bantayanan usab sa iyang mga sakop sa Semana Santa mao ang illegal nga sugal nga tigbakay sa kabarangayan.