Ang mga kaalyado ni Presidente Rodrigo Duterte sa PDP-Laban nagpasiugda og lakang nga nag-awhag kaniya nga magpapili pagka-bise presidente karong sunod tuig nga eleksiyon. Kay matod pa sa mga nagpasiugda, mapadayon sa Presidente ang iyang nga programa nga dili matiwas human sa iyang termino. Kasagaran sa mga nagpasiugda appointed officials nga naghawid karon og gamhanan nga posisyon sa kasamtangang administrasyon.
Ang ako lang ikasulti ning maong mga tawo, mga “sipsip” sila ug ang ilang lakang gipaluyohan og personal nga interes ug nahigam o naghinakog sila sa gahum. Gusto silang magpabilin ang Presidente sa gahum aron magpabilin usab sila sa posisyon karon kay nakatilaw na silag lami. Kon magalgal si Digong, dako ang posibilidad nga modaug siya. Apan kon modaug, unsa ang mahimo sa bise presidente nga kon sa ligid pa, reserba ra.
NAMULITIKA NA?
Usa ka dakong minaot kanang moingon ang pulitiko sa Pilipinas nga dili una ta maghisgot og eleksiyon karon kay layo pa kaayo na. Kana minaot kay ang labing tinuod nga nahitabo sa Pilipinas mao nga ang pagsugod sa kampaniya para sa eleksiyon sa 2022 niadto rang pagkahuman sa eleksiyon sa 2019.
Ang pagkatapos sa unang eleksiyon mao usab ang sinugdanan sa kampaniya sa sunod nga eleksiyon. Ingon niana ka dakong negosyo ug industriya kining pulitika para sa mga Pinoy. Maong atong yam-iran kanang magpa-dikidiki ug moingon nga “wa koy plano sa eleksiyon” kay kana dakong pamakak ug minaot.
Mao nga kining plano sa taga PDP-Laban nga pagpadagan kang Digong pagka bise presidente maoy normal nga buhatunon sa mga haligi sa ilang partido. Mga partido nga labihan ka haguka kay klaro man kining mapalid sa hangin ug mahanaw lang sama sa buwa kon laing partido na ang modaog sa sunod nga piniliay.
Kadto na usab nga mananaog nga partido mao ang hugyawan ug kapyotan niining nagpabilib nga mga sakop sa partido sa Presidente. Di na kita makurat nga lain na usab nga mga dagway sa political butterflies o “balimbing” ang maghugot ug mag-ambahan ngadto sa administrasyon kon kinsa ang molingkod sa Malakanyang.