MAGSAYSAY, Davao del Sur -- Mihatag na og pagtugot ang Municipal Inter-agency Task Force (MIATF) nga subling ibalik ang operasyon sa Magsaysay Gallera human gihimo ang inspeksyon sa ilang mga sakop.
Apan adunay gipagawas nga istriktong patakaran ang MIATF nga kinahanglang sundon sa nagduma sa maong sabongan.
Una niini, mihimo og rekomendasyon ang economic development cluster aron abrihan pagbalik ang sabongan human gipasirad-an niadtong Marso 2020 tungod sa pandemya ug pagtaas sa ihap sa mga nataptan sa coronavirus disease 2019 (Covid-19) sa lungsod.
Human nakita sa IATF nga mikunhod na ug manageable lamang ang kaso sa kagaw sa ilang lugar kon itandi sa ubang mga dapit, miuyon na kining ibalik ang operasyon sa sabongan.
Ilawom sa gipagawas nga guidelines, kinahanglan nga magsul-ob og face mask ang mosulod sa sabongan, anaa sa 1.5 meters ang social distancing ug manghugas og kamot ug mag-sanitize sab ang matag usa.
Adunay imuntar nga mandatory temperature checking pinaagi sa thermal scanner mao nga dili mahimong mosulod ang usa ka indibiduwal nga anaa sa 37.5 pataas ang iyang temperatura, gawas nga kinahanglan sab ang pagdala og Contact Tracing System (CCTS) nga ipailawom sa scanner.
Dili sab molapas sa 150 ka tawo ang anaa sa sulod apil niini ang nagduma ug mga kawani.
Hugot nga gidili ang pagkatawa ug pagsiyagit-siyagit sa sulod aron malikayan ang paglagpot sa laway ug naka-disinfect na daan ang palibot sa sabongan, usa ka adlaw una ang sabong aron ma-proteksiyonan ang mga mosulod sa lugar.
Wala sab gitugtan ang pagbaligya og ilimnong makahubog sa sulod ug usa lamang ka stall ang gitugtang mamaligya og pagkaon.
Dugang niini, mao ang pagmuntar og closed-circuit television (CCTV) camera diin ang kopya sa video i-sumite ngadto sa MIATF human ang sabong.
Giklaro sa MIATF nga mahimo nilang bawion ang pagtugot ugaling makita nga adunay mga kalapasan sa gipatumang guidelines mao nga gikinahanglang motuman gyud ang mga sabongero aron di mawad-an sa ilang kalipay.