Di mi suod sa Cebuanang artista nga si Chai Fonacier (morag na PBB housemate ni siya, di ko sure) pero nalipay ko sa balita nga apil siya sa usa ka international movie. Garbo ni siya sa mga Bisaya.
* * *
Sa ako nang nasuwat dinhi, naglikay na kog sunod sa mga teleserye kay di ko gusto nga mapugos og balik sa balay bisan may lakaw aron di makapalta sa mga kalambuan.
Ang bag-o lang nahuman nga Pinoy Big Brother Connect apil niini. Pero dihang walo na lang ka housemates ang nahibilin, nisuway kog sunod kay hapit na man mahuman.
Ikaduha, kay gusto kong makasaksi kon maapil ba sa Big Four ang Cebuano nga si Chiko.
Apan sa usa ka challenge nga may bentaha unta si Chiko, na-apsan siya ni Liofer Pinatacan ug nakaingon ko: ‘Di maayong senyal.’
Si Kobie niasuway unta pagsanta pero wa kaabot sa time limit. Niadto pa lang, nakaingon ko nga may posibilidad kini si Liofer og nidaog gyud kini.
* * *
Kataw-anan ang mga housemates nga napalayas nga nangutana ug nikomentaryo sa Big Four. Bitter sila tan-awon.
Bisan tuod niingon si Kuya Big Brother nga hinimohimo ra ang mga komentaryo nga gikan kuno sa mga tumatan-aw (ug tingali, sa mga housemates sab), wa ko kauyon sa komentaryo alang kang Liofer nga kuno ambisyoso nga naapil sa Big Four nga bati mag nawong.
Bugason si Liofer pero, kon sa linya pa ni anhing Inday Charlotte Cinco, ‘may kaambong nga mahagpat.’ Artistahon man god og dagway si Liofer.
Atong atangan kon hatagan ba siyag kahigayunan.
* * *
Duna say teleserye nga Almost Paradise diin daghang mga Pinoy nga mga artista ang naapil sa cast (Noni Buencamino, Zsa Zsa Padilla ug uban pa). Sa trailer, di lang drama ang gipakita sa mga Pinoy kon di kamaayo usab sa aksyon.
* * *
Usa sa mga gikalingawan nako karon mao ang pag-ensayo sa mga kanta alang sa Semana Santa uban ang Immaculate Conception Parish Grand Choir. Kinsay nag-ingon nga boring ang life panahon sa pandemic?
Daghang challenges nga makapamabulokon sa life. Anà!