KONSEHAL sa lungsod sa Argao nireklamo sa police station human siya sulnga sa iyang kaubang opisyal, kinsa nasuko kaniya kay ginganlan siya sa usa ka vlogger nga maoy nanabi nga gikabit ang iyang secretary.
Ang reklamo sa konsehal napatik sa blotter sa Argao police station.
Ang tinuod nga mga ngan sa mga opisyal ug vlogger gipugngan ning mantalaan samtang wa pa mapasaka ang kasong cyber libel.
Ang komprontasyon nila ni Miguel ug Vic (pulos di nila tinuod nga mga ngan) nahitabo niadtong Marso 11, 2021 sa alas 6:45 sa gabii.
Si Miguel dunay kuyog sa pag-adto sa balay ni Vic, konsehal sa lungsod. Apan si Vic nanghimakak ngadto kang Miguel nga siya ang tinubdan sa mga tabi nga gikabit ni Miguel ang iyang secretary.
Ang vlogger nga si Nini (di tinuod niyang ngan) ni-post sa iyang Youtube channel sa Marso 7, 2021 nga namasangil kang Vic nga maoy nanabi nga gikabit ni Miguel ang iyang secretary.
Pipila ka mga adlaw human sa komprontasyon, ang secretary ni Miguel nagpa-blotter sa kapulisan sa lungsod sa Argao, matod ni Police Major Sheila Gurtiza, hepe sa Argao police station.
Si Gurtiza niingon nga kay naa man sa social media gi-post ang pasangil, ilang gi-refer ang secretary ngadto sa Regional Anti-Cyber Crime Unit (RACU) 7 nga maoy dunay jurisdiction.
Gikompirmar usab sa bag-ong milingkod nga regional chief sa RACU 7, Police Colonel Mary Ivy Salazar, nga midangop sa ilang buhatan ang secretary ni Miguel.
“Si _______hindi pa pumunta dito, yung kanyang staff pinost sa Facebook na na-involve doon sa rumor na kabit-kabit. Inasist na namin and then prini-serve na namin ang evidence,” matod ni Salazar.
Ilang giawhag si Miguel sa pagpasaka usab og kasong cyber libel batok sa vlogger.
Mihimo na usab silag aksyon sama sa pagpa take down sa mga video sa vlogger diin makita nga nagsayaw sayaw kini nga naka under wear lang sa dihang iyang gibutyag nga si Miguel dunay relasyon sa iyang secretary.
Ang mga video mahimong magamit nga ebedensya sa cyber libel nga ipasaka sa secretary ug opisyal, dugang ni Salazar.
Sa pag kutlo ning balita, wala pa mohatag sa iyang pamahayag si Miguel.