KAPULISAN sa Siyudad sa Sugbo mipahibawo nga andam na sila sa paghatag sa seguridad sa kasaulogan sa ika-500 ka tuig sa pag-abot sa Kristyanismo sa nasud.
Matod ni Police Lieutenant Colonel Wilbert Parilla, deputy city director for operations sa Cebu City POlice Office ( CCPO), kapin sa usa ka libo ka mga pulis ang ilang andamon nga mopatuman sa seguridad ug minimum health standard.
Apan sa pagkakaron, dason ni Parilla, kuwang ang ilang puwersa hinungdan nga nagpadala silag komunikasyon sa Police Regional Office (PRO) 7 nga padugangan og 300 ka personnel nga ipakatap sa kadalanan sa siyudad atol sa Quincentennial commemorations karong Abril 4, 2021 nga gipaabot nga saksihan kini sa mga debotong Katoliko.
Gawas sa mga pulis, moabag usab ang 180 ka sakop sa Task Force Kasaligan ug mga personnel sa Prevention Restoration, Order, Beautification Enhancement (Probe) team lakip na ang City Environmental Sanitation and Enforcement Team (Ceset).
Wala pa masayod si Parilla kon isaka ba sa PRO7 ang ilang alert status gikan sa heigthened ngadto na sa full alert atol sa adlaw nga saulogon ang ika 500 ka tuig nga Kristyanismo sa nasud.
Pasabot ni Parilla nganong daghang personnel ang ipakatap sa siyudad bisan wala dinhi maka tutuk ang kalihukan, gipaniguro lang nila nga matuman ang social distancing aron dili mo takod ang corona virus disease 2019.
“Kon atong tan-awon, gamay ra ang atung activity pero daghan tag mga personnel, this is to ensure nga dili lang ang anti criminality mabantayan but also to make it sure nga mapatuman gyud nato ang atoang minimum health standard.. unyag mobalik ang Covid-19,” matod ni Parilla.
Sa pagsugod sa kalihukan sa Dominggo, Abril 4, adunay tulo ka motorkada nga himuon nga magsugod sa Basilica paingun sa dakbayan sa Mandaue ug Lapu-lapu ug mobalik na usab sa siyudad sa Talisay diin ilang gipaniguro nga di mabalda sa trapiko.
Gidili sa kapulisan ang paggamit sa firecrackers nga sagad himuon sa mga debotong Katoliko panahon sa Sinulog lakip na ang pagpalupad og balloons sanglit peligro kini sa kuryente.
Gipahibawo na ang kapulisan gikan sa simbahan nga adunay mga dumoduong gikan sa nagkalainlaing nasud ug mga opisyal sa gobiyerno nga motambong apan wala pa sila tagai sa listahan kon kinsa kini. (AYB)