NIDAWAT ang Kagamhanan sa Dakbayan sa Lapu-Lapu og award tungod sa kampanya batok sa gidiling drugas gikan sa Department of the Interior and Local Government (DILG) ubos sa liderato ni Secretary Eduardo Año.
Ang National Anti Drug Abuse Council niila sa ilang maayong performance sa pagkompleto sa mga kategoriya sa gilusad sa nasudnng kagamhanan nga gubat batok sa gidiling drugas.
Si DILG Lapu-Lapu City Officer-in-Charge Jonah Pino maoy nitunol ngadto kang Lapu-Lapu City Mayor Junard Chan sa award niadtong niadtong Marso 17, Miyerkules.
Ang award gipirmahan nila ni Año ug Dangerous Drug Board (DDB) Secretary Catalino S. Uy.
Bugtong ang Lapu-Lapu maoy nakadawat sa naasoy ngga award tali sa tri-cities sa Metro Cebu.
“Dako kaayo natong garbo ug dungog nga nakadawat ta’g marker from the DILG, with regards sa atong campaign against illegal drugs as we are the only LGU nga nakadawat aning klase nga award,” matod ni Chan.
Gipasalamatan ni Chan ang mga sakop sa kapulisan, Philippine Drug Enforcement Agency (PDEA), City of Lapu-Lapu Office for Substance Abuse Prevention (C-Losap) ug ang kabarangayan sa nakab-ot nga kalamposan sa kampanya sa gidiling drugas.
“Kining performance audit award dako kaayo ning puntos sa LGU and in fact kay mao ning gipatan-aw sa national government agency ang pag-comply ani nga mga awards,” matod ni Pino.
Gipasabot ni Pino nga usa sa nakahatag og dakong puntos sa performance sa dakbayan mao ang pagdeklarar nga drug-clear sa Barangay Caohagan.
Gitagaan ang barangay ug kagamhanan og special awards kalabot sa pagmintinar sa ilang status nga drug-free sukad sa 2019.
Ang director sa C-Losap nga si Garry Lao nipadayag nga laing naghatag og dakong puntos sa performance sa dakbayan mao ang pagmintinar og usa ka drug free workplace sa kagamhanan, anti drug information education campaign sa mga tunghaan ug barangay ug ang community based drug rehabilitation ug after care program diin maghatag ang kagamhanan ug panginabuhian sa mga drug surrenderer. (GCM)