Di kabayran ang kalampusan sa higayon nga makab-ot mo ang ibabaw nga bahin sa Muffin Peak, sa uban naila kining Bocaue Peak nga nahimutang sa Bonbon, bukirang bahin sa Dakbayan sa Sugbo.
Ang Dakbayan sa Sugbo usa ka highly urbanized city, malambuon ug taas ang potensiyal ilabi na kon ekonomiya ang hisgutan.
Apan taliwala sa malambuong dakbayan, nagpabilin gihapon ang kanindot sa kinaiyahan ilabi na sa mga bukirang bahin niini.
Kini tungod kay sa among pagtungas sa lugar adunay busay nga malabyan, nindot nga talan-awon sa kinaiyahan ug uban pa, sa dili pa nimo maabot ang tumoy nga bahin sa Muffin Peak.
Sa pagpadayon sa hulga sa coronavirus disease mas ni-prefer kami og sakay og pribadong sakyan.
Salamat sa lider sa among grupo nga naka-hitch mi og sakay.
Sa 2:20 sa hapon gisugdan namo ang among pagbaktas pinaagi sa pagsubay sa rota sa Buhisan apan pasidaan lang sa mga nag-plano nga mosuroy nga struggle is real ang maong kalsada tungod kay saka-on, dulhogon ug kurbadahon, alang niadtong dili hanas pa kaayo momaneho og sakyanan.
Sa 3:30 sa hapon among naabot ang Bagsakan Outpost sa Barangay Pamutan.
Kini usa ka outpost nga gigamit sa mga bikers, hikers, climbers, trekkers ug uban pa nga abutanan kay ang outpost makita pinaagi sa Google maps.
Manukad sa Bagsakan Outpost adunay kalsada nga maoy subayon nga magdala kanimo sa tiilang nga bahin sa Muffin Peak ug gipili namo ang mubo nga rota apan tungason tungod kay apiki na mi sa oras.
Sa katapusan, sa mga 4:45 sa hapon milampos kami sa among tinguha sa pagsaka sa Muffin Peak.
Bisan sa nagpamuypoy namong paa ug batiis, wala namo kini igsapayan sa dihang misugat sa akong panan-aw ang 360 degrees view sa kabukiran sa dakbayan sa Sugbo.
Ang makatagbaw niining latason nga bukid nga magsibling “cherry on top” maoy ang pagsawop sa haring adlaw, daw sama sa bulawan ang kolor sa kalingatan sa dihang inanay nga mipahipi ang adlaw sa mga panganod.
Among gitagbaw ang among kaugalingon sa ibabaw nga bahin nga nagsilbing ganti sa akong kahago ug kutas nga gilatas aron makab-ot ang among tinguha.
Sa among pagkana-og aron nga kami mama-uli, wala na mi nisubay sa among unang gi-agian, daw dili kini grabeng katungason apan taas ang maong rota.
GASTOHAN
Tungod kay aduna miy nagamit nga pribadong sakyanan ang among nabayran mao lang ang parking fee.
Kon sa pagkaon, igo lang mi nagtampo-tampo og P150 matag usa.
TIPS
Tungod sa pagpunay og baktas, mas bintaha nga magbawon og tubig mainom, mas bintaha nga mag-sleeves o leggings tungod sa trail nga daghang hait nga tanom.
Pagsul-ob og proteksiyon sa ulo. Awhag ina-amigo “be a responsible hinuroy,” ayaw pagbilin og basura, paglikay nga magdaob o camp fire gumikan niining ting-init.
Labaw sa tanan tahura ang mga lokal. /CONTRIBUTOR
Niño Dwight R. Ligan, 23, taga-Barangay Dapitan, lungsod sa Cordova, usa ka content creator. Siya mahiligon sa hiking, trekking, camping ug diving.
MODAWAT OG CONTRIBUTOR
Sa mga “certified hinuroy” mamahimo ninyong i-submit sa Superbalita Cebu ang inyong kasinatian sa mga dapit nga inyong nasuroyan.
Higayon na nga mapatik dinhi sa pamantalaan ug sa Superbalita Cebu website ang inyong Suroy escapade.
Mamahimo ninyong i-submit ang inyong materials (maximum 500 words o 3,000 characters/high resolution pictures): florendaquerubin@gmail.com alang sa dugang pangutana mamahimong makatawag sa 09154410665. / EDITOR
